Ярты гасырдан соң очрашу

1973 елда мәктәпне тәмамлаган 39 егет һәм кыз бәхет эзләп, бөтен ил буйлап таралганнар. Менә 50 елдан соң алар кабат очраштылар. Очрашуга ул елда унынчы сыйныфны тәмамлаган 24 сыйныфташ килде, кызганыч, унбишесе инде бакыйлыкка күчкәннәр. Кунакларны Аксубай техникумы бусагасында директор Фәргать Аюпов каршы алды. Ул килүчеләргә мәгариф учреждениесе эше турында сөйләде, кабинетлар буенча экскурсия үткәрде. Кулинария цехында сыйныфташлар техникум осталары тарафыннан эшләнгән тортны рәхәтләнеп татып карадылар. АТУТта күргәннәр кунакларны тирән тәэсирләндерде.

– Авыл хуҗалыгы хезмәткәрләрен әзерләүче мондый һөнәри учреждениене күргәнебез юк иде, - дип алынган хисләре белән уртаклашты алар. – Бу - район горурлыгы.

Сыйныфташларның очрашуы дулкынландыргыч, шатлыклы атмосферада узды. Әлеге сыйныф укучылары райондагы башка йөзләрчә сыйныфлар кебек үк гади. Ул чор заманы буенча, чыгарылыш укучыларының күпчелеге үз тормышын авыл хуҗалыгына багышлаган. Алар арасында районда танылган җитәкчеләр, производство хезмәткәрләре бар. Озак еллар дәвамында район үсешенә Россельхозүзәкнең район бүлеге җитәкчесе Габдерәшит Гелметдинов, тармак ветераны Мансур Миндубаев, шулай ук Илгизәр Сруров, Рифкать Камалетдинов, Минәхмәт Хәлиуллин, Рөстәм Муратшин, Хөсәен Шакиров, Фәүзия Срурова, Сания Муратшина күп өлеш керткәннәр. Спорт мастеры дәрәҗәсенә күтәрелгән Җәмил Әбраров яшьләрне спорт белән шөгыльләнүгә җәлеп итү өчен районга шактый гына спорт инвентарьлары алып килде.

Һәркемнең тормышында хезмәт еллары, гаилә, балалар һәм оныклар билгеле бер бизәк булып тора. Бергә очрашкач, алар үзләре турында сөйләделәр, ә иң мөһиме, туган мәктәпләрен, укытучыларын искә алдылар һәм аларга игелекле һәм гадел булырга өйрәткәннәре һәм тормышта үз юлларын табарга ярдәм итүләре өчен рәхмәт әйттеләр.