Ягып-җылыту сезоны башланды

Җылыту сезоны башлану турында эшлекле дүшәмбедә район башкарма комитеты җитәкчесе Станислав Зайцев җиткерде.

–Тәүлек әйләнәсе кешеләрнең яшәве оештырылган приют һәм Федоровка интернат-йорты, социаль хезмәт күрсәтү үзәге, хастаханә кебек социаль учреждениеләргә, балалар бакчаларына һәм мәктәпләргә җылы җибәрелде, – дип шәрехләде башкарма комитет җитәкчесе.

Ягып-җылыту чоры биш көн рәттән һава температурасы 8 градустан түбәнрәк булгач, алтынчы көнне башлана. Әмма күп кенә муниципалитетлар, шул исәптән Аксубай районы башкарма комитеты да, барыннан да элек, кешеләр даими булган учреждениеләрне күздә тотып, ягып-җылыту сезоны башлану турында карар чыгардылар.

– Әмма җылыны, һава торышына карап, сакчыл кулланырга кирәк, – дип искәртте предприятиеләр һәм оешмалар җитәкчеләрен район башлыгы Камил Гилманов. – Әлегә җылы һава торышы сакланганда, салкын сезонга лимитны экономияләү максатыннан, куллану минималь булырга тиеш.