Геройлар беркайчан да үлми – алар безнең хәтердә яши

Мәктәп бинасы каршына укучылар, педагоглар, авыл халкы, район активы җыелды.

– Андрей Ксенофонтов хәрби бурычны үз гомере бәрабәренә үтәде, – диде район Башкарма комитеты җитәкчесе Алмаз Мингулов. – Аның турындагы истәлек безнең йөрәкләрдә һәрвакыт яшәячәк. Геройлар мәктәп укучыларын тәрбияләү өчен үрнәк булсын өчен, без үзебездән торганнарның барысын да эшләячәкбез. Балалар, сез мәктәбегездән нинди геройлар чыкканын белергә һәм безнең сугышчы якташларыбызга зур хөрмәт белән карарга тиешсез.

Митингта катнашучылар алдында Үзәк хәрби округы инспекторы генерал-майор Анатолий Молоствов чыгыш ясады.

– Без каһарманнарыбыз белән горурланабыз. Алар без тыныч күк астында яшәсен өчен, гомерләрен дә бирергә әзер, – дип ассызыклады ул.

– Андрей Ксенофонтов үзен мин анда, Ватанга кирәк дип карар итте, – диде Иске Тимошкино авыл җирлеге башлыгы Полина Мулеева. – Ул дөньяда тынычлык булсын өчен сугышка китте һәм тынычлык хакына үзенең гомерен бирде.

Андрей Ксенофонтовны бер минутлык тынлык белән искә алдылар. Иң истәлекле момент килеп җитте: мемориаль тактадан җәймәне салдырдылар. Митингта катнашучылар мемориалга чәчәкләр салдылар.

Андрей Ксенофонтов 1984 елның беренче июнендә Яңа Тимошкино авылында Александр Михайлович һәм Светлана Васильевна Ксенофонтовлар гаиләсендә дөньяга килә. Ул тыйнак һәм шаян малай булып үсә, балык тоту белән мавыга. Гаиләдә өлкән бала буларак, сеңелесе белән энесе турында кайгырткан, әти-әнисе өчен беренче ярдәмче булган.

Яңа Тимошкино мәктәбен тәмамлаганнан соң, Аксубай техникумында механизатор белгечлеге ала. Ул яхшы укыган, спорт белән шөгыльләнгән һәм барлык иҗтимагый эшләрне җаваплы башкарган. Ул ачык күңелле, кайгыртучан, ярдәмгә килергә әзер торуы белән авылдашларының ихтирамын казанган.

Хезмәт эшчәнлеген авылда тракторчы буларак башлый, соңрак Төньякта эшли, аннары Казанда җиһаз җитештерү фабрикасында хезмәт куя. 2022 елның октябрендә ул авылдан беренчеләрдән булып махсус хәрби операциягә ирекле рәвештә китә. Батырларча көрәшә. Сугышчы нацистларны тамырыннан ук корыту өчен гомерен дә кызганмый. 2023 елның октябрендә хәрби бәрелешләр вакытында авыр яралана.

– Ул тормышны яратты, тормышка сөенә иде, аның кадерен белә иде, – дигән сүзләрне яңгыраттылар алып баручылар. – Ул чын патриот иде.