Бригадир балта осталарын шәхси үрнәгендә эшләргә илһамландырган

Авыл хуҗалыгы производствосы ветераны Александр Шурыгин озак еллар «Восток-3» колхозының төзелеш бригадасын җитәкли.

Шул ук вакытта җитәкче таләпчән һәм кырыс булырга тиеш, дигән фикергә карамастан, Александр Сергеевич кирәгеннән артык тыйнак, сабыр, йомшак холыклы бригадир була.

– Ирем һәрвакыт балта осталарын үзенең шәхси үрнәгендә эшләргә илһамландырды, – диде, ирен 90 яшьлек юбилее белән котлап, тантана сәбәпчесенең тормыш иптәше Лия Ивановна. – Беркайчан да кул астындагыларга тавыш күтәрмәде. – Табигатьтән йомшак холыклы булуы белән тормышта беркемне дә рәнҗетмәде. Без аның белән җиде бала тәрбияләп үстердек – алты ул һәм бер кыз. Ирем иртәдән алып кичкә кадәр колхозда да, өй хуҗалыгында да даими хезмәттә булды. Аның беркайчан да ачулы йөзен күрмәдем, ул һәрвакыт ихтирамлы булды, хәзер дә миңа да, балаларга да, кешеләргә карата да шундый.

Юбилей тантанасын - да катнашкан авыл җирлеге җитәкчесе Нина Михайлова билгеләп үткәнчә, тантана сәбәпчесе үзе шундый булганга күрә, бүген дә авылдашлары, җирле хакимият органы җитәкчелеге тарафыннан ихтирам һәм абруй казана.

Александр Шурыгин, үзе әйткәнчә, ике ашлык саклагыч, авыл клубын, мәктәпнең элеккеге бинасын төзүдә катнашкан.

Колхозда балта осталары бригадасы өчен эш һәрвакыт табылган. Алар фермаларны, гаражларны, склад һәм амбарларны ремонтлау буенча кирәкле эшләрне башкарганнар, силос чокырларын төзәткәннәр. Өйдә йорт хуҗасын, әтиләрен күрмәгәннәр дә диярлек. Иртә таңнан ул идарәдә булган, эшкә наряд алган, кич белән соң гына кайткан. Колхоз бригадиры үз эшенә җитди, зур җаваплылык белән караган, наряд буенча алган эшне генә түгел, вазыйфасына кергән бурычларны да үтәгән, инициатива күрсәткән, предприятие өчен җан аткан. Александр Шурыгинның Владимир Ленинның 100 еллыгына «Фидакарь хезмәт өчен» медале белән бүләкләнүе очраклы түгел. Юбиляр шулай ук социалистик ярышлар җиңүчесе була.

– Колхоз коллективларының нигезен нәкъ менә Александр Сергеевич кебек кешеләр тәшкил иткән, – диде, ветеранны истәлекле вакыйга белән котлап һәм район башлыгыннан бүләк тапшырып, башкарма комитет җитәкчесе урынбасары Сергей Александров. – Һәм андый кешеләрне тулы хокук белән авыр авыл хезмәтендә маяк дип атарга мөмкин.

Ветеранның күңеле нечкәрде, күз яшьләре аша ул рәсми кунакларга зурлаганнары өчен рәхмәт укыды.