Ата-аналар БДИ турында: белем генә түгел, психологик кәеф тә мөһим

3 нче Аксубай мәктәбе базасында «Ата-аналарның бердәм БДИ тапшыру көне» акциясе узды. Быел да, элеккегечә, анда булачак чыгарылыш сыйныф укучыларының әти-әниләре генә түгел, җәмәгатьчелек вәкилләре дә катнашты, алар арасында район башлыгы урынбасары Илшат Заһидуллин һәм башкарма комитет җитәкчесе Станислав Зайцев та бар иде.

Бердәм дәүләт имтиханын язарга теләүчеләр өчен Бөтенроссия акциясе инде бишенче тапкыр уза. Мәгариф бүлеге методисты Татьяна Борисова сүзләренә караганда, акция чыгарылыш сыйныф укучыларына һәм аларның ата-аналарына БДИга әзерлек белән бәйле артык психологик киеренкелекне бетерергә ярдәм итәчәк.

Имтихан үткәрү процедурасында быел да сизелерлек аерма юк. Быел да, узган елдагы кебек үк, битлекләрдә керү, температураны үлчәү, һәр җирдә санитайзерлар,  коридорларда да, аудиторияләрдә дә социаль дистанцияне үтәү. Имтиханга бары тик паспорт буенча гына кертелә, ә рюкзак, кәрәзле телефон яки блокнот кебек шәхси әйберләрне башка кабинетта калдыралар. Партада  –  кара пасталы  ручка, паспорт, черновик һәм, имтихан материаллары.

Быел ата-аналарга рус теле буенча бердәм дәүләт имтиханын, әлбәттә, кыскартылган вариантта 3,5 сәгать урынына 40 минут язарга тәкъдим ителде. Биремнәр нибары өч-ике генә, анда кыска җавап бирергә кирәк, һәм укылган текст нигезендә инша язарга.

Акциядә катнашучылар сүзләренә караганда, алар бик күп сораулар килеп чыгуга карамастан, биремнәрне  үтәделәр: хаталар булган очракта нәрсә эшләргә, балалар барысын да язарга өлгерәме, дулкынлануны ничек җиңәргә һ.б. сорауларга методист Татьяна Борисова җавап бирде.

– Әлбәттә, дулкынлану булачак, һәм ул беркая да китмәячәк. Шуны ышандырып әйтә алам, һәр мәктәптә дә укытучылар укучылар белән килеп чыгарга мөмкин булган барлык кыенлыкларны җентекләп тикшерә. Укучылар имтиханнарга бер генә көн  әзерләнмиләр, имтихан хәвефләрен җиңеп чыгу юллары һәм үзеңне психологик яктан әзерләү күнекмәләре белән танышалар. Ата-аналар ягыннан да ярдәм кирәк,  – дип ассызыклады ул.