Аксубайда Халыкара Өлкәннәр көне күңелле үтте.

Биредә төрле тармак, үзгәртеп корылган предприятиеләр ветераннары җыелды. Кояшлы һава торышы җылы аралашуга корылган иде. Өлкәннәр көненә багышланган тантаналы чараны район башлыгы Камил Гилманов ачты.

– Сез район иминлеге өчен алны-ялны белми эшләдегез, төрле тармакларда фидакарь хезмәт куйдыгыз, – дип билгеләп үтте ул. – Сез киләчәк өчен күп эшләр башкардыгыз. Сезгә чын күңелдән сәламәтлек, бәхет, гаиләләрегездә үзара аңлашу, кадер-хөрмәттә булуыгызны телим. Бәйрәм белән! Без алга таба да районны төзекләндерәчәкбез, ямьләндерәчәкбез, сезгә уңайлы һәм яхшы булсын өчен иң яхшы шартларны тудырачакбыз.

Безнең ветераннарыбыз бик актив, спорт белән шөгыльләнәләр, талантлы, район данын республикада күтәрәләр. Район җитәкчесе тамашачыларның көчле алкышлаулары астында “Балкыш” үзешчән башкаручыларның Республика фестивале лауреатлары «Настроение» бию ансамбле җитәкчесе Валентина Гурьяновага һәм ансамбль коллективына, җырчылар Нина Волковага, Лидия Нураевага, Леонид Воркуновка Дипломнар тапшырды.

Көзге парк буенча яңгыравыклы көйләр агылды. Районның иң оста үзешчәннәре тармак ветераннарына үзләренең җырларын бүләк иттеләр.

Өлкән буын вәкилләре концерттан, бер-берсе белән аралашудан онытылмас тәэсирләр алдылар. Аксубай бистәсе башлыгыннан бүләкләр алып, өйләренә күтәренке кәеф белән киттеләр.