Аксубай районында велосипедлар парады узды 

Иске Мокшино авылында кызыклы һәм мавыктыргыч чара узды. Билгеләнгән урынга балалар велосипедларда билгеләнгән вакытка кадәр килеп тә җиттеләр. Гади велосипедларда түгел, ә үз куллары белән бизәлгән велосипедларда. 

Балалар велосипедларны бизәү биремен үтәүгә иҗади якын килгәннәр. Әлбәттә, аларга бу эштә әти-әниләре ярдәм иткән. 

Бу чара юл хәрәкәте кагыйдәләрен кабатлау белән узды. Балалар велосипед җайланмасын, детальләрнең исемнәрен җентекләп белделәр. 

Кызлар һәм малайлар командалары арасында ярышлар вакытында аерым атмосфера хөкем сөрде. 

Чара чишмәгә сәфәр белән тәмамланды, анда барысын да сусыл карбыз һәм төрле тәм-томнар белән сыйладылар.