Аксубай районы «Сөткә юл!» дигән унынчы юбилейлы автойөрешне каршы алды
Безнең районда сөт тармагын үстерүгә юнәлтелгән авточараларда катнашучылар составында сөт тармагы вәкилләре – сөт җитештерүчеләр, эшкәртүчеләр, фермер хуҗалыклары делегациясе булып китте.
Автойөреш ел саен Россиянең төрле төбәкләрендә үткәрелә. Быел анда катнашучылар дүрт көн дәвамында Татарстанның җиде муниципаль районының сөт предприятиеләрендә булачак. Аның составында дистәләгән автомобиль – 150дән артык вәкил бар.
«Сөткә юл!» – сөт базарында катнашучылар өчен традицион һәм тармак өчен мөһим вакыйга. Ул сөт һәм сөт продуктларын популярлаштыруга, сөт җитештерүчеләргә һәм эшкәртүчеләргә ярдәм итүгә, базарда катнашучылар арасында тәҗрибә алмашуга юнәлдерелгән. Иртән Казаннан Игенчеләр сарае каршындагы мәйданнан әләмнәр белән бизәлгән җиңел автомобильләр кәрваны юлга чыкты. Беренче тукталыш – Аксубай районы.
Автойөрештә катнашучыларны Нурлат ягыннан район чигендә ипи-тоз, чәк-чәк һәм чуаш куасы белән каршы алдылар. Район башлыгы Камил Гилманов кунакларга сәламләү сүзе белән мөрәҗәгать итте.
– Без сезгә бик шат, – дип билгеләп үтте ул. – Районда сөт, ит җитештерелә, безнең хезмәтчәннәр эштә югары нәтиҗәләргә омтыла. Авыл хуҗалыгы предприятиеләрендә урып-җыю башланды. Механизаторлар яхшы икмәк үстерделәр. Һәм сез нәкъ менә үзегезнең килүегез белән кәефене тагын да күтәрәсез. Мондый очрашудан соң җитештерү күрсәткечләре дә югарырак булыр дип өметләнәм.
Район юллары буйлап әйләнеп узып, автотрассадан Яңа Ибрай авылына таба борылгач, автоколонна «Аксу Агро» ҖЧҖнең сөт комплексы янында тукталды. Бу сөтчелек юнәлешендәге предприятие – районда иң яхшы, нәтиҗәле предприятиеләрнең берсе. Биредә 1400дән артык сыер асрала, эш җитештерүнең заманча технологияләре нигезендә оештырылган. Көн саен 33 тонна 700 килограммнан артык сөт савалар. Яшь терлекләрнең үсеше югары дәрәҗәдә. Кунаклар сөтчелек комплексы эше белән кызыксынып таныштылар, сөт терлекләре асрала торган корпусларны, төрле яшьтәге яшь бозауларны карадылар, сыерларга азыкның ничек салынуын күзәттеләр. Делегацияне район авыл хуҗалыгы һәм азык-төлек идарәсе җитәкчесе Борис Соломонов, «Аксу Агро» ҖЧҖ генераль директоры Аркадий Пирогов озатып йөрде. Килүчеләрнең сыерлар һәм бозауларны карау һәм тәрбияләү буенча сораулары күп булды, алар шунда ук җаваплар алдылар.
Соңыннан күңелле тантана булды. Автоузышта катнашучылар Аркадий Пироговка истәлекле билге – «Сөткә юл!» дигән ябыштыргыч бүләк иттеләр. Бу – авыл хуҗалыгы предприятиесенең терлекчелек тармагы эшенә югары бәя.
– Без яхшырак эшләргә, терлекләрне карау, ашату процессын камилләштерергә тырышабыз, – дип ассызыклады җитәкче. – Киләчәктә нәселле хуҗалыкка әйләнү өчен һәр көн кечкенә адым белән ситуацияне тигезлибез.
Автойөрештә катнашучылар очрашуны җылы алкышлар белән төгәлләделәр, аксубайлылар белән яхшы дуслар буларак аерылыштылар. Аннары маршрут буенча аларны киләсе тукталыш – Чистай көтте.
Следите за самым важным и интересным в Telegram-каналеТатмедиа
Нет комментариев