Аксубайлылар Бөек Ватан сугышында һәлак булганнарны велоузыш белән искә алдылар

Мәйданга бик күп балалар җыелды: «Форпост» үзәгендә, «Беренчеләр хәрәкәте» яшьләр иҗтимагый оешмасында катнашучылар, мәктәп укучылары һәм спорт мәктәбендә тәрбияләнүчеләр.

Россия Федерациясе һәм Татарстан гимннары яңгырады. Акциядә катнашучылар Бөек Ватан сугышында һәлак булган барлык солдатларны бер минутлык тынлык белән искә алдылар

– Без бу аяусыз сугышта фашистларны җиңгән яклаучы сугышчыларыбызны, ата-бабаларыбызны рәхмәт белән искә алабыз, – дип билгеләп үтте «Форпост» үзәге директоры Надежда Ким, чараны ачып. – Без аларга үз тормышыбыз, тыныч күк йөзебез белән бурычлы.

– Бүген бездә тизлеккә, вакытка, финишка кем тизрәк барып җитүгә көч сынашу түгел, – дип мөрәҗәгать итте җыелучыларга яшьләр эшләре һәм спорт бүлеге җитәкчесе Светлана Башатова. – Бу чара Бөек Ватан сугышының һәлак булган геройларына багышлана.

Балигъ булмаганнар арасында хокук бозуларны профилактикалау буенча инспектор Фоат Абдуллин ике бабасының да фронтта сугышулары һәм икесенең дә — берсенең Эстониядә, икенчесенең Белоруссиядә һәлак булулары турында сөйләде.

– Сугыш һәр гаиләгә кагылган, – дип ассызыклады ул. – Үз гомерләре бәрабәренә безгә тынычлык бүләк иткән кешеләрне онытырга хакыбыз юк.

Волонтерлар исеменнән Валентина Селезнева чыгыш ясады:

– Сезнең бәхетле балачагыгызга, якты киләчәгегезгә ата-бабаларыбыз нигез салган, – диде ул. – Безгә әле сугышның чын тере геройларын күрергә туры килде. Алар безгә канкойгыч сугышлар, фронт дусларын югалтуның авырлыгы турында сөйләделәр. Бу кабатланмасын өчен, без, волонтерлар, махсус хәрби операциядә көрәшүчеләргә ярдәм итеп, мөмкин булганның барысын да эшлибез.

Яшь буын вәкилләре бүгенге көн герое – махсус хәрби операциядә катнашучы Михаил Маклаковның сүзләрен аеруча игътибар белән тыңладылар. Сугышчы ассызыклаганча, Бөек Ватан сугышында һәлак булган кешеләр истәлеге безнең йөрәкләрдә мәңге яшәргә тиеш. Ә махсус хәрби операция турында сөйләп, яшь буынны:

– Без җиңү белән кайтачакбыз! – дип ышандырды ул.

Велоузышка старт бирелде. Йөзләгән тамашачы күзәтүе астында велосипедчылар брусчатка буйлап ашыкмыйча һәм оешкан төстә уздылар. Бу ата-бабаларыбызның батырлыкларына хөрмәт күрсәтү, алар ярдәмендә без тынычлыкта һәм иректә яшибез.