Аксубайда Россиянең яңа регионнары белән берләшү көнен билгеләп үттеләр

Чараны Валентина Гурьянова җитәкчелегендәге «Вдохновение» хореография ансамбле артистлары ачып җибәрде. Аларның элегантлык һәм грация белән тулы чыгышы бөтен кич буена югары, бәйрәмчә тон бирде.

Район халкына сәламләү сүзе белән район башлыгының социаль мәсьәләләр буенча урынбасары Алексей Тимирясов мөрәҗәгать итте.

– Район җитәкчелеге, шәхсән үз исемемнән сезне шундый истәлекле дата белән котлыйм. Өч ел элек 23-27 сентябрьдә Донецк һәм Луганск Халык Республикаларында, Запорожье һәм Херсон өлкәләрендә Россия белән яңадан кушылу турында референдум узды. Һәм, әлбәттә инде, бу яңа төбәкләрдә яшәүчеләр Россия белән яңадан кушылу өчен тавыш бирделәр, үзләренең дөрес сайлавын ясадылар. Бүген Россия бу төбәкләрнең үз составында булуы белән горурлана. Хәзерге вакытта да илебез гадел көрәш алып бара, яңа төбәк халыклары мәнфәгатьләрен яклый. Алгы сызыктагы сугышчыларыбызга аерым рәхмәт сүзләре әйтәсе килә. СВО уздыру зонасында якташларга күрсәткән ярдәмегез өчен сугышчыларның әти-әниләренә, район халкына рәхмәт белдерәсем килә. Бик зур рәхмәт! Бәйрәм белән!

Районыбызның актив һәм битараф булмаган кешеләрен бүләкләү тантанасы булды.

Аксубай волонтерлары Нина Пискарева, Людмила Нестеркина, Сергей Ефремовны актив гражданлык позицияләре һәм махсус хәрби операциядә катнашучыларга ярдәм итү өчен гуманитар ярдәм җыюны оештыруга керткән шәхси өлешләре өчен район башлыгының Рәхмәт хаты белән бүләкләделәр.

СВОда катнашучы хәрбиләргә ярдәм күрсәтүдә актив эшләгәннәре өчен «Чик сакчылары» бергәлегеннән «Россия волонтеры» медальләрен Савгач авылыннан Галина Леонтьевага, Алина Тимофеевага, Нина Михайловага тапшырдылар.

Безнең бүлекчәләргә матди һәм гуманитар ярдәм күрсәтүдә битараф булмавы, ярдәмчеллеге һәм рыясызлыгы өчен 268 нче үзйөрешле артиллерия полкының шәхси составы командованиесеннән Рәхмәт хаты белән иң яшь волонтер Егор Чугунов бүләкләнде. Шулай ук бүләкне Аксубайның «Үзебезнекеләргә ярдәм» волонтерлары төркеме дә алды.

Бәйрәмне район мәдәният йорты артистларының һәм балалар сәнгать мәктәбенең яшь талантларының матур чыгышлары дәвам итте.