Аксубайда Ленинның туган көнен билгеләп үттеләр

Митингта районның ветераннар советы әгъзалары, Аксубайның 3 нче мәктәбе укучылары, үзәк китапханә һәм балалар сәнгать мәктәбе хезмәткәрләре катнашты. Митингны мәдәният бүлеге җитәкчесе Наталия Куштукова ачты.

– Бөек илебез тарихы өчен Владимир Ленин шәхесе зур әһәмияткә ия, – дип ассызыклады ул. – Ул 1917 елгы социалистик революция лидеры, Россия социал-демократик эшчеләр партиясенә (большевикларга) нигез салучы, РСФСР Халык Комиссарлары Советының беренче рәисе була. Ленин дөньяда беренче социалистик дәүләт төзи һәм гомере буе тигезлек һәм гаделлек өчен көрәшә.

Митингта катнашучыларга район башлыгы урынбасары Илшат Заһидуллин мөрәҗәгать итте.

– Ленин чорында башкарылган эшләрнең күпчелеге җәмгыять үсеше өчен бик мөһим булган, – дип билгеләп үтте ул. – Без комсомол, пионерия һәм октябрятларны үттек – бу бик матур чор иде. Безнең бурычыбыз – тарихны истә тоту.

Митингта яшьләргә аерым игътибар бирелде. Хәзерге балаларның зур мөмкинлекләре булуы билгеләп үтелде. Алар интернеттан теләсә нинди мәгълүматны берничә секунд эчендә таба, өйрәнә, аңлый һәм нәтиҗә ясый алалар.

Митинг азагында катнашучылар һәйкәл итәгенә чәчәкләр салдылар, бу буыннарның дәвамчанлыгын һәм үткәнгә хөрмәтне гәүдәләндерде.