Аксубайда КВН: коррупциягә каршы көлкеле һөҗүм

Бу кич тамашачылар өчен онытылмас булыр – катнашучылар җыелучыларга шатлыклы мизгелләр һәм көлке бүләк итте.

«Нежность» КЦСОН, үзәк китапханә, Виталий Тимирясов исемендәге 1 нче Аксубай мәктәбе һәм балалар сәнгать мәктәбе командалары үзләренең талантларын һәм иҗади сәләтләрен күрсәттеләр.

КВН атмосферасы – ул ялкынлы юмор, мәзәкләр, музыка, җырлар. Катнашучыларны район башлыгы Алмаз Мингулов җылы сәламләде.

– Коррупциягә каршы көрәш – хәзерге җәмгыятьтәге мөһим бурычларның берсе, һәм аның чишелешенә һәр гражданның тормышындагы иминлек һәм гаделлек турыдан-туры бәйле, – дип ассызыклады ул. – Тема бик катлаулы булса да, командаларга яхшы чыгыш ясап, уеннан ләззәт алырга телим.

Чара программасы дүрт бәйгедән торды: сәламләү, өй эше, сораулар һәм җаваплар, шулай ук музыкаль номер. Фестивальнең барлык этаплары командаларда катнашучыларның юмористик талантларын ачарга гына түгел, ә тамашачыларга җәмгыятьтә бу тискәре күренешне иң көлке хәлдә тәкъдим итәргә дә мөмкинлек бирде. Катнашучылар гаҗәеп дәрәҗәдә югары әзерлек күрсәттеләр – гәрчә оешма хезмәткәрләренең репетицияләргә, атрибутика, костюмнар әзерләүгә вакытлары җитәрлек булмагандыр. Шулай да бу аларның сәхнәдә нинди дәрәҗәдә талантлы булуларын күрсәтә. Тамашачыларның игътибарын аеруча ачык һәм үткен сюжетлар, кызыклы видеокүренешләр һәм оригиналь җыр җәлеп итте, анда коррупциягә каршы көрәш темасы юмор аша, ләкин тирән мәгънә белән тәкъдим ителде. Сәхнәдә барган күренешләрдән тамашачылар рәхәтләнеп көлеп утырдылар. «Нежность» халыкка социаль хезмәт күрсәтү үзәге, китапханә хезмәткәрләре, сәнгать мәктәбе һәм беренче мәктәп укытучылары кебек җитди оешмалар хезмәткәрләре тудырган образларны тамаша кылып, көлмичә калу мөмкин түгел иде. «Артистлар» аудиториягә шулкадәр дәрт һәм җиңеллек бүләк иттеләр. Ә җанатарлар, алкышлар, плакатлар белән үз командаларын бик актив хупладылар.

Чыгышның һәр ягы җентекләп уйланылган, ә һәр катнашучының хезмәте уртак максатка юнәлдерелгән иде. Нәкъ менә шундый команда бердәмлеге һәм үзара ярдәмләшү нәтиҗәсендә әлеге иҗтимагый әһәмиятле бәйрәмне уңышлы уздыруны билгеләгән җиңү пазлы барлыкка килде. Коррупциягә каршы көрәш – хакимиятнең бурычы гына түгел, ә җәмгыятьнең барлык әгъзаларының уртак җаваплылыгы да. Мондый чаралар халыкта коррупция күренешләренә тискәре мөнәсәбәт формалаштырырга һәм нормаль социаль мөнәсәбәтләрне ныгытырга ярдәм итә.

КВНчыларга сорау-җавап бәйгесендә бераз баш ватарга туры килде. Кайбер җавапларны шулкадәр тирәннән эзләргә кирәкми дә иде. Мәсәлән, безнең өчен бу чорда бик актуаль булган «җавап»:

– Әгәр журналист коррупция турында сөйләсә, кемне утырталар?

Монда иң тапкырлары район газетасын искә төшерде.

– Ә сез барыгыз да «Авыл таңнары»на язылдыгызмы?

Тамашачылар да, чыгыш ясаучылар да жюриның нинди бәя бирәчәген тын да алмый күзәтте. Комиссия әгъзаларының кулларында «5» билгеләре күтәрелгәч, зал да, сәхнә дә гөж килде.

Һәм менә программаны алып баручы, район башлыгының коррупциягә каршы көрәш буенча ярдәмчесе Эльмира Крайнова бәйгедә катнашучы командаларның нәтиҗәләрен игълан итте. Жюри рәисе Валентина Селезнева һәм жюри әгъзасы Ольга Сетрова район башлыгының Рәхмәт хатларын һәм беренче урын өчен истәлекле бүләкләрне «Нежность» КЦСОН командасына тапшырдылар – залда көчле алкышлар яңгырады. Шундый ук бүләкне һәм икенче урын өчен призларны көчле алкышлар астында үзәк китапханә командасы алды, өченче урынга – сәнгать мәктәбе, дүртенче урынга Аксубайның 1 нче мәктәбе командалары чыкты. Тамашачылар КВНчыларны җылы котладылар, аларның чыгышларына соклануларын белдерделәр.

Фотогалерея.