Аксубайда «КЭС-Баскет» уеннары иң яхшы баскетболчыларны билгеләде

Ярышлар «Яшьлек» спорт комплексы базасында узды. Ярыш барган көннәрдә мәйданчыкта спорт азарты һәм ярыш атмосферасы хөкем сөрде.

Яшүсмерләр арасында көч сынашу нәтиҗәләре буенча В.Г. Тимирясов исемендәге 1нче урта мәктәп – I урынны, 3нче Аксубай урта мәктәбе – II урынны, Иске Тимошкино урта мәктәбе III урынны яулады.

Кызлар арасында Иске Мокшино урта мәктәбе баскетболчылары беренче урынны алды. Икенче урында – 1нче Аксубай мәктәбе укучылары, өченче урында – Иске Тимошкино мәктәбе баскетболчылары.

Җиңүчеләргә һәм призерларга кубоклар һәм медальләр тапшырылды. Шулай ук иң нәтиҗәле уенчыларны да призлар белән билгеләп үттеләр. Бу – өченче мәктәп укучысы Вячеслав Рябов һәм Иске Мокшино урта мәктәбеннән Алина Ижбаторкина.