Аксубайда Гаилә, мәхәббәт һәм тугрылык көнен билгеләп үттеләр

Бу кичне паркның концерт мәйданчыгында буш урыннар юк иде. Бәйрәм программасын карарга Аксубайның барлык почмакларыннан халык җыелды, хәтта гаиләләре белән килделәр – кечкенә балалар мәйданчыкта уйнадылар, таганда атындылар, ә әти-әниләр чыгышларны тамаша кылдылар.
Туган якны өйрәнү музее хезмәткәрләре кичәдә катнашучылар белән кызыклы осталык дәресе үткәрделәр, анда игътибар үзәгендә гаилә бәхетен гәүдәләндергән ромашка таҗлары булды. Ял кичәсе матур көйләр, үзешчән артистларның, иҗат коллективларының якты чыгышлары һәм алкышлар астында узды.

Район башкарма комитеты җитәкчесе Станислав Зайцев җыелучыларга котлау сүзләре белән мөрәҗәгать итте.

– Ел саен бу бәйрәм зур популярлык казана бара, – дип билгеләп үтте ул. – Моны нәкъ менә илебез гражданнары арасында Гаилә, мәхәббәт кебек төшенчәләрнең төп гаилә кыйммәтләре булуы раслый. Чөнки гаилә – рухи-әхлакый башлангычларны, буыннар дәвамлылыгын саклаучы. Бу – җәмгыятебезнең тотрыклылыгының төп күрсәткече.

Башкарма комитет җитәкчесе Россия Федерациясендә Гаилә, мәхәббәт һәм тугрылык көнен үткәрү буенча оештыру комитетыннан «Мәхәббәт һәм тугрылык өчен» мактау медален һәм грамотаны Яңа Аксубай авылыннан Елена һәм Юрий Охотниковлар гаиләсенә тапшырды.

Елена Геннадьевна һәм Юрий Валентинович утыз биш ел элек язмышларын бәйләгәннәр. Районда алар бер-берсен яратып яшәүче ныклы гаилә буларак билгеле. Гаилә хуҗабикәсе мәдәният хезмәткәре, талантлы җырчы, аның чыгышлары тамашачыларга зур шатлык китерә. Ә гаилә башлыгы һөнәре буенча 38 еллык эш стажы булган инженер-механик.

Охотниковлар уллары Борисны һәм кызлары Надежданы тәрбияләп үстергәннәр. Борис – Ватан сакчысы, чын герой, аның белән горурланырга мөмкин. Надежда эшмәкәр һөнәрен сайлаган. Охотниковлар балалары һәм оныклары килүен түземсезлек белән көтеп алалар.

– Сезгә һәм якыннарыгызга бәхет һәм иминлек! – дигән теләкләр яңгырады сәхнәдән тантана гаеплеләре адресына.

Кичәдә катнашучыларны Бөтенроссия Гаилә, мәхәббәт һәм тугрылык көне белән район башкарма комитетының ЗАГС бүлеге җитәкчесе Светлана Крайнова котлады. Ул гаилә тормышының энҗе юбилярларына (30 ел) Урмандееводан Ирина һәм Владимир Егоровларга, рубин юбилярлар (40 ел) Алевтина һәм Виталий Маркиннарга Рәхмәт хатлары һәм истәлекле бүләкләр тапшырды.

Тамашачыларның музыкаль бүләге Владимир Егоров башкаруындагы җыр булды.

Җыелучыларны гаилә бәйрәме белән «Мәрхәмәт – шәфкатьлелек» район Советында хатын-кыз депутатлар берләшмәсе җитәкчесе, район мәдәният йорты директоры Ольга Копанева да җылы котлады. Ул шулай ук клуб оешмаларында катнашучыларга, укучыларның ата-аналарына һәм педагогларга активлыклары, талантлары, мәдәнияттә ирешкән уңышлары өчен рәхмәт белдерде. Бу кичне дистәләгән яшь артистлар иҗат өчен рәхмәт йөзеннән Грамоталар, Рәхмәт хатлары, истәлекле бүләкләр алдылар һәм тамашачыларның җылы алкышларына лаек булдылар.