Аксубайда фототозаклар урнаштырдылар һәм контейнерлар янында чүплекләр оештыручыларга штраф салачаклар

Аксубай бистәсе башкарма комитеты район үзәге чикләрендә һәм аның тирәсендәге чүплекләргә каршы көрәшүдән арып, соңгы чараны кулланырга булды.

– Без сезнең газета аша да, социаль челтәрләрдә дә, җыелышларда да: чүп-чарны күршеләр белән берләшеп яисә аерым гына да, чыгарырга булса, шалтыратыгыз, арба куябыз, – дип хәбәр иттек. Бакча, көнкүреш чүп-чарларын, барысын да төяп алып китәбез, әмма контейнерлар янында чүплекләр ясарга һәм аны кешеләр күрмәгән урыннарга чыгарып ташларга кирәкми. Без Аксубайда һәм аның тирә-ягындагы рөхсәтсез чүплекләрнең барлык урыннарын беләбез, анда фототозаклар урнаштырдык, аларны контейнер мәйданчыклары янында урнаштырабыз. Ботаклар, коры үлән – көнкүреш чүп-чары түгел, аларны контейнерлар янында җыярга ярамый, каты көнкүреш калдыкларын чыгару операторы аларны алып китәргә һәм утильләштерергә тиеш түгел. Ахыр чиктә – Аксубайның каты көнкүреш калдыклары полигоны ерак түгел һәм халыктан чүп-чарны бушлай кабул итү турында килешү бар, – ди Аксубай бистәсе башлыгы урынбасары Алмаз Бакиров.

Барысы да беренче майны удар хезмәт белән бәйрәм иткәндә һәм бакчада эшләнгәндә, техника һәм Аксубай бистәсе башкарма комитеты эшчеләре бригадасы стихияле чүплекләрдән чүп ташып, тәртип урнаштырырга мәҗбүр. Аларны кеше хезмәтен санга сукмыйча, бакча чүп-чарын контейнерлар янында өеп калдырган кешеләрнең позициясе һәм тәрбиясезлеге шаккаттыра.

Ләкин хәзер геройларны фототозаклар ярдәмендә танып беләчәкләр. Камераларга инде өч аксубайлы эләккән – хокук бозулар теркәлгән, мәгълүмат административ комиссиягә тапшырылган. Хокук бозучыларга штраф яный. Суммалар ике меңнән өч мең сумга кадәр, ә ел дәвамында кабат бозган очракта 3500дән 5000 сумга кадәр.