Аксубайда байкерлар балаларга шатлык бүләк итте

«Юность» спорт комплексы территориясендә гадәти булмаган һәм якты бәйрәм – Чаллы, Түбән Кама һәм Чистай мотоклубларында катнашучылар белән очрашу узды. Хәйрия чарасы районның опека, попечительлек һәм социаль яклау бүлекләре һәм мотоберләшмә тарафыннан бергәләп оештырылды.

Бу вакыйга район яшьләре өчен чын бүләк булды: узган елның ноябрь ахырында балалар район мәдәният йортында байкерлар белән очрашканнар иде, һәм алар җәй көне мотоциклларда килергә вәгъдә иттеләр. Вәгъдәне үтәделәр. Автоюлда озын мотоколонна пәйда булгач, балалар бик шатландылар: аларның күбесе элек беркайчан да төрле маркалы һәм модельле мотоцикллар күрмәгән.

Спорт комплексы территориясендә кунаклар техниканы тигез линиягә тезеп куйдылар. Ачык сары, кызыл, ак мотоцикллар балаларның да, өлкәннәрнең дә игътибарын җәлеп итте. Кызлар һәм малайлар күн куртка һәм джинс кигән байкерларга сокланып карадылар, техника белән янәшә фотога төштеләр һәм байклар турында сораулар бирделәр.

Мотоклубны оештыручы, төркем җитәкчесе Максим Суслопаров очрашуны мөһим искәртү белән ачып җибәрде:

– Барыбыз өчен дә беренче һәм иң мөһим кагыйдә – юл хәрәкәте кагыйдәләрен үтәү. Иң мөһиме юлда куркынычсызлык, – дип мөрәҗәгать итте ул балаларга. – Безнең өчен техниканы күрсәтү генә түгел, балаларга юлларда үз-үзеңне куркынычсыз тоту культурасын тәрбияләү дә мөһим.

Кунакларга район Башкарма комитеты җитәкчесе урынбасары Алексей Тимирясов мөрәҗәгать итте:

– Районыбызга һәм балаларыбызга ярдәм күрсәткәнегез, килүегез һәм бүләкләрегез белән сөендергәнегез өчен район башлыгы Алмаз Мингулов исеменнән рәхмәт белдерәсем килә, – диде ул. – Максим Суслопаров һәм Андрей Алексеев – безнең хөрмәтле якташларыбыз, бәлки, төркемдә районнан чыккан башка кешеләр дә бардыр. Мондый чаралар балаларның хәтерендә озакка кала һәм аларга зур шатлык китерә.

Алексей Тимирясов Яр Чаллы, Түбән Кама һәм Чистай мотоберләшмәләренә хәйрия чарасын оештырганнары, балаларга карата игътибарлы игелекле булулары өчен район башлыгының Рәхмәт хатларын тапшырды.

Бәйрәм программасы бик бай һәм кызыклы булды. Батут, сыйлар белән пунктлар эшләде – балаларга эшмәкәр Сергей Федотовтан татлы мамык, туңдырма тәкъдим иттеләр.

Иң мавыктыргыч момент мотоциклларда мини узышлар булды: балалар башта куркынычсызлык буенча зур булмаган мастер-класс үттеләр, аннары байкерлар күзәтүе астында мотоциклда йөрү мөмкинлеге алдылар.

Һәрбер заезд бер схема буенча үтте: яшь пассажирлар утырган мотоцикллар спорт комплексының бордюрыннан китеп, бина тирәли әйләнеп чыктылар да, икенче баланы утырту өчен, башлангыч ноктага кайттылар. Балаларның йөзләрен күрергә кирәк иде – алар бәхеттән балкыды. «Штурманнар» арасында мөмкинлекләре чикләнгән балалар да булган; алар өчен мондый уңай хис-кичерешләр аеруча әһәмиятле булып чыккан. Ата-аналар балаларының кәефенә чын күңелдән сөенделәр һәм бәйрәмнең җылы атмосферасы өчен оештыручыларга рәхмәт белдерделәр.

Мотоциклчылар мондый очрашуларның үзләре өчен дә мөһим булуын билгеләп үттеләр:

– Балалар янына килгәндә, хәтта нинди генә фаразга карамастан, һава торышы яхшыра, кояш чыга. Балаларның шатланганнарын күрү – безнең өчен иң яхшы бүләк, – дип уртаклаштылар байкерлар.