Аксубайда 2023 елның язгы чакырылышы тәмамланды

 Казанга киткән төркем составында Беловкадан Алексей Бульбов һәм Константин Белимов, Яңа Чуаш Адәмсуыннан Денис Долгов, Ерепкинодан Данила Ижотов, Иске Савруштан Роман Кузьмин, Мюдтан Павел Тарасов, Иске Үзидән Данила Чернов, Иске Ибрайдан Айрат Шәрифуллин, аксубайлылар Денис Егоров, Геннадий Краснов, Руслан Нургатин һәм Владимир Сергеев бар иде.

Саубуллашу минутлары район җитәкчелеге, «Ватанга хезмәт итәм» ветераннар хәрәкәте вәкилләре катнашында Аксубайның барлык халкы өчен истәлекле урында – Хәрби Дан мемориалында узды.

– Һәр ир-егет Ватан алдындагы изге бурычны үтәргә – армиядә хезмәт итәргә тиеш, – дип ассызыклады район башлыгы Камил Гилманов. – Армиядә хезмәт итү – горурлык һәм затлылык билгесе. Без сезнең бер елдан исән-сау әйләнеп кайтуыгызны көтәбез. Районга эшче куллар кирәк, гаиләләр кору һәм балалар тудыру өчен яшьләр кирәк. Ләкин башта сезне мөһим эш – хезмәт көтә. Хәерле юл, егетләр.

Хәрби хезмәткә чакырылучыларга ҮХО инспекторы генерал-майор Анатолий Молоствов үгет-нәсихәтләрен белдерде.

Чирмешән һәм Аксубай районнары хәрби комиссары подполковник Сергей Иванов билгеләп үткәнчә, сафта торучы егетләр – Туган илнең чын ир-егетләре.

– Бер ел – күп вакыт түгел, ул бик тиз узачак һәм улларыгыз өйләренә әйләнеп кайтачак, – диде ул, әти-әниләргә мөрәҗәгать итеп. – Хәрби хезмәткә чакырылучылар, ел дәвамында сезнең бурычыгыз – хәрби-хисап белгечлеген өйрәнү, һәм мин сезгә гаскәрләрдә алган күнекмәләрнең һәм белемнәрнең тормышта беркайчан да кирәк булмавын телим.

Митингны дәвам итеп, районның «Ватанга хезмәт итәм» иҗтимагый оешмасы вәкилләре иртәгәге сугышчыларга изге теләкләр әйттеләр. Аның җитәкчесе Виталий Маркин ата-аналар улларының Ватанга хезмәт итүләре белән горурланырга тиешлеген билгеләп үтте. ГСВГ җәмгыяте җитәкчесе Алексей Никитин бүген аның иң яхшы укучыларының берсе, элекке яшь армияче Денис Долговның сафка басуы белән горурлануын белдерде. Павел Крюков РВСН җәмгыяте исеменнән егетләргә намуслы хезмәт итеп һәм бер елдан соң өйләренә имин кайтуларын теләде.