Аксубай «Россия йөрәге» гаилә учагын чирмешәнлеләргә тапшырды

Тантаналы чара алдыннан күрше районнан делегация туган якны өйрәнү музеенда булды, районыбызның тормышы һәм тарихы белән танышты. Район мәдәният йорты фойесындагы теманы дәвам итеп, алар музей фотокүргәзмәсен, үзәк китапханәнең Гаилә елына багышланган китап-журналлар күргәзмәсен карадылар. Шулай ук агачка бизәк төшерү һәм чүлмәк ясау эше белән шөгыльләнүче Андрей һәм Марина Бикмуллиннар гаилә остаханәсе белән таныштылар.

Гаилә учагын тапшыру тантанасы никахлашу залында узды. Тантанада катнашучыларны район башкарма комитеты җитәкчесе урынбасары Сергей Александров сәламләде.

—Бүген без бу капсуланы Чирмешән районына рәхәтләнеп тапшырабыз, — диде ул.— Бу районда гаиләләр бәхетле, тулы һәм нык булсын, дип телибез. Нык гаиләләр күп булганда, җәмгыять көчле һәм тотрыклы, ә Илебез җимерелмәс булачак.

Тантанада катнашучыларга Аксубай православие чиркәве башлыгы протоиерей Александр Качаев мөрәҗәгать итте.

— Кеше үзен аны чолгап алган кешеләр — балалары, тормыш иптәше яисә ире, әти-әнисе, оныклары бәхетле булганда гына үзен бәхетле хис итәчәк. Шуны истән чыгармаска кирәк, без мәхәббәтебезне якыннарыбыз белән уртаклашканда гына бәхетле булабыз.

Район мөхтәсибе ярдәмчесе Равил хәзрәт Камалетдинов гаиләләргә иң изге теләкләрен җиткерде.

ЗАГС бүлеге җитәкчесе Светлана Крайнова игътибар үзәгендә «Россия йөрәге» гаилә учагы уты булган чаралар турында сөйләде. Биш көн дәвамында ЗАГСта йөздән артык кеше булган.

Сәламләү сүзе белән Чирмешән районы башкарма комитеты җитәкчесе урынбасары Ләйләгөл Мөксинова чыгыш ясады.

— Гаилә учагы символы районыбызда лаеклы урын алачак, — диде ул.

Һәм менә — тантаналы, иң истәлекле мизгел: Чулпан һәм Иршат Хәнифовлар яшь гаилә пары — Ринат һәм Эльвина Гарифуллиннарга гаилә учагы ялкыны белән капсула тапшырдылар.

— Гаиләгезгә татулык, бәхет һәм, иң мөһиме, безнең кебек үк, күп балалы булуыгызны телибез, — диделәр Хәнифовлар.

Тантананы район мәдәният йорты артистларының җырлары бизәде.