Аксубай районының Савруш авылында махсус хәрби операциядә катнашучының әти-әнисе тавыш бирде

Биредә 576 нчы сайлау участогы урнашкан. Бөтен ил өчен мөһим карарга катнашы булу өчен, бирегә сайлаучылар килә һәм билгеле бер кандидат өчен үз тавышларын бирә. Авылда һәр кешене яхшы беләләр һәм участок сайлау комиссиясе әгъзалары авылдашларын ачык йөз белән каршы алалар.

– Безнең сайлау участогында 441 сайлаучы теркәлгән, – дип шәрехләде участок сайлау комиссиясе рәисе Светлана Петрова. – Хәзерге вакытта гражданнарның 47 проценты тавыш бирде.

Без илле елдан артык игенчелектә хезмәт куйган Николай Степанов тавыш бирүдә катнашу шаһиты булдык. Үзебезнең газетада авыл хуҗалыгы ветеранының хезмәт казанышлары турында күптапкырлар яздык һәм аның белән сайлау участогында очрашуыбызга шат булдык. Сайлауларга ул тормыш иптәше белән килде. Алар тыныч кына үз тавышларын бирделәр һәм уйнатуда катнашу өчен беләзекләр алдылар. Сайлау процедурасы уңай атмосферада узды.

– Минем улым махсус хәрби операциядә катнаша, – диде Николай Леонтьевич. – Булачак Президентны сайлап, мин аның белән илебездә барысы да яхшы, тыныч һәм тотрыклылык булыр, балаларыбыз һәм оныкларыбыз бәхетле яшәр дип өметләнәм.

Степановлар сайлау участогында очраган кешеләр белән җылы аралаштылар һәм икәүләшеп күтәренке күңел белән китеп тә бардылар.