Аксубай районында “Тоннель” вакытында юл хәрәкәте кагыйдәләрен бозуның 17 очрагы теркәлгән

Дәүләт автоинспекциясе һәм полиция хезмәткәрләре юл хәрәкәте кагыйдәләрен үтәүне тикшерделәр, элементар куркынычсызлык кагыйдәләрен игътибарсыз калдырган йөртүчеләргә аерым игътибар бирелде.

Операциянең максаты – юл-транспорт һәлакәтләрен киметү һәм район юлларында куркынычсызлыкны арттыру. Кагыйдәләрне аз гына бозу да фаҗигале нәтиҗәләргә китерергә мөмкин бит.

Кызганычка каршы, рейд вакытында 17 хокук бозу очрагы ачыкланган: 6 машина йөртүче иминлек  каешын эләктермәгән, 3 пассажир кагыйдәләрне үтәмәгән, һәм 8 машина йөртүче юл билгеләре һәм тамгалары таләпләрен бозган.

– Куркынычсызлык каешы – һәлакәт очрагында гомерне саклап калырга мөмкин булган иң гади чара, – дип шәрехләде ЮХИДИ бүлеге инспекторы Илшат Сибгатуллин. – Ә балалар автокреслосы –  иң нәни пассажирлар турында кайгырту.

Аксубай районының дәүләт автоинспекциясе барлык машина йөртүчеләрне һәм пассажирларны үзләренең һәм якыннарының куркынычсызлыгы өчен җаваплы булырга өнди. Юл хәрәкәте кагыйдәләрен үтәгез, куркынычсызлык каешын эләктерегез, балалар өчен махсус автокреслоларны кулланыгыз!