Аксубай эшмәкәрләренә дәүләт ярдәме чаралары турында сөйләделәр

Районның эшкуарлык җәмәгатьчелеге белән республика ведомстволары вәкилләре очрашты.

– Аксубай районында биш йөздән артык урта һәм кече бизнес объекты эшли. Бу – ике меңгә якын кеше, – дип билгеләп үтте район Башкарма комитеты җитәкчесе Алмаз Мингулов. – Районда 26 мең кеше яшәгәндә, бу – зур коллектив. Хәзерге вакытта дәүләтнең бизнеска ярдәм итү, иң актуаль проблемалар буенча юнәлешләре шактый.

Бизнеска ярдәм чаралары, эшмәкәрләрне финанслау һәм субсидияләү программаларын да кертеп, “Татарстан Республикасы эшмәкәрлекне яклау фонды” НОның генераль директоры Айдар Салихов җентекләп сөйләде.

Роспотребнадзорның Татарстан Республикасы буенча Нурлат территориаль бүлеге җитәкчесе Гүзәл Бадыгина якын киләчәктә үз көченә керәчәк товарларны мәҗбүри маркировкалау кагыйдәләре турында сөйләде. Ул бу чараның кулланучылар хокукларын яклау һәм гадел көндәшлек мохиты булдыру өчен мөһимлеген ассызыклады. Тыңлаучылар, эштә мөмкин булган кыенлыкларны булдырмас өчен, яңа кагыйдәләр кертүгә әзерлек буенча тәкъдимнәр алдылар. Эшмәкәрләрнең дәүләт структуралары вәкилләре белән очрашуы ачык диалог формасында узды. Катнашучылар спикерларга сораулар бирделәр һәм тулы җаваплар алдылар.

Аксубай районына сәфәре кысаларында Айдар Салихов район Башкарма комитеты җитәкчесе Алмаз Мингулов белән бергә “Гарант” сәнәгать мәйданчыгы” ҖЧҖендә булды, икмәк-күмәч эшләнмәләре, металл өслекләр әзерләү предприятиесе эше белән танышты. Шулай ук алар “ИП Морозов В.Ю.” сәнәгать паркында булдылар, аның киләчәк үсеше мәсьәләләре турында фикер алыштылар, шәхси эшмәкәр Максим Ефимовның “Универмаг” сәүдә үзәге эше белән таныштылар.