Аксубай егетләре армиядә башкаларга үрнәк булырга дигән боерык алдылар

Алар арасында: Урмандееводан Кирилл Анисимов, Сидул-Ерыклыдан Кирилл Чернов, Сосновкадан Адель Филиппов, Федор Матюшкин, Васильевкадан Адель Васильев, Емелькинодан Григорий Елисеев, Яңа Тимошкинодан Даниил Ильмурзин, Владислав Леонтьев, Сергей Павлов, Яңа Ибрайдан Алмаз Мостафин һәм Нияз Гыйльметдинов, аксубайлылар Иван Иванов, Сергей һәм Дмитрий Ликеевлар, Фәннүр Сәлахов һәм Рәзил Хамәтшин бар.

Егетләрне озату иртәнге 04.30 сәгатькә билгеләнгән булуга карамастан, Хәрби дан мемориалы янында кеше күп җыелды. Оешмалар һәм ведомстволар җитәкчеләре, ветераннар хәрәкәте вәкилләре егетләргә хәерле юл теләргә килделәр. Озатырга килүчеләрнең якын кешеләре белән бергә булу, аңа хәерле юл теләр өчен вакытлары бик аз иде. Байраклар җилфердәде, сугыш чоры җырлары яңгырады. Мондый җырлар белән авылларда элек тә ир-атларны фронтка, армиягә озатканнар. Яшьләр аны белә һәм дәвам итә һәм бу символик мәгънәгә ия – традицияләр яши.

Җыелучыларга район башлыгы Камил Гилманов мөрәҗәгать итте.

– Армия сезне үз өстегездә эшләргә, тәртип һәм дисциплинага өйрәтәчәк, – диде ул. – Армиядә хезмәт итеп, сез Ватан алдындагы изге бурычны үтисез һәм киләчәккә яхшы юл ачасыз. Чөнки алда – тулы бер тормыш. Армиядә үзеңне яхшы яктан күрсәтергә кирәк. Башкалар өчен үрнәк булыгыз, үз өстегездә эшләгез, ышанычлы дуслар табыгыз. Ата-аналарга, әлбәттә, улларын озату авыр, ышаныгыз, аларның бар да яхшы булачак. Егетләр, хезмәтне намус белән үтәгез һәм исән-сау әйләнеп кайтыгыз.

Егетләргә үзенең хәер-фатихаларын Үзәк хәрби округы инспекторы генерал-майор Анатолий Молоствов җиткерде.

– Ел дәвамында сезгә хәрби фәнне үзләштерергә туры киләчәк, сез безнең өметне акларсыз, өлкән иптәшләрегез кебек намуслы хезмәт итәрсез дип ышанып калабыз.

Булачак солдатларга Аксубай районы благочинные иерей Антоний Рыбочкин хәрби хезмәткә фатиха бирде.

– Сез бүген җаваплы адым ясыйсыз, – диде ул. – Бер ел хезмәт итү чорында сезнең тормышта күп нәрсәләр үзгәрәчәк. Чөнки армия – ул тормыш мәктәбе. Хезмәттә иң мөһиме – хәрби уставны үтәү. Хезмәтне лаеклы алып баруыгызны телим.

Булачак солдатларга «Ватанга хезмәт итәм» ветераннар иҗтимагый оешмасы җитәкчесе Виталий Маркин һәм чик сакчылары берлеге вәкиле Алексей Бобов изге теләкләрен җиткерделәр.

Күркәм йола буенча район башлыгы һәрберсенә исемле бүләкләр – кәрәзле телефоннар тапшырды.