Аксубай авыл хуҗалыгы предприятиесе җитәкчесе юбилеен бәйрәм итә

Иртәдән үк ул район җитәкчелегеннән, хезмәттәшләреннән, туганнарыннан һәм якын кешеләреннән котлаулар кабул итте. Авыл хуҗалыгы предприятиесе җитәкчесенә тәбрикләүләр белән район авыл хуҗалыгы идарәсе җитәкчесе Борис Соломонов килде.

– Сез районда иң эре хуҗалыкларның берсен җитәклисез, нәтиҗәле хезмәт куясыз, – дип билгеләп үтте ул. – Сезгә хезмәттә алга таба уңышлар, озак елларга сәламәтлек һәм бәхет телим, предприятие чәчәк атсын.

Иршат Хәнифов зур хезмәт юлы узган, дистә елдан артык гомерен авыл хуҗалыгына багышлаган. Яшь чагында Мюд совхозында тракторчы, комбайнчы, шофер булып эшли.

Берничә ел сәүдә өлкәсендә хезмәт куя, әмма 2010 елда авыл хуҗалыгы тармагына әйләнеп кайта. Белеме буенча – галим-агроном, эшчәнлеген «ВАМИН- Аксу» агрофирмасында агроном вазыйфасында башлый. Шулай ук төрле участокларда идарәче булып эшли. Биш ел ярым дәвамында ул җитәкчелек иткән «Волга-Селект» игенчелектә зур уңышларга иреште. Узган елның сентябреннән Иршат Хәниф улы «Чистополье» ХКның «Аксу Агро» АФ башкарма директоры булып тора. Бу предприятие районда 23 меңнән артык гектар җир били, анда 218 кеше хезмәт куя. Хуҗалык тотрыклы, үсештә, коллектив нәтиҗәләргә ирешүгә максат куеп эшли.

Юбиляр кайгыртучан тормыш иптәше, күп балалы әти. Хатыны Чулпан Минзаһит кызы белән биш бала тәрбиялиләр. Гаилә мөнәсәбәтләрендә дә Хәнифовлар зур танылуга ирештеләр – «Ата-ана даны» ордены медале белән бүләкләнделәр.

Хезмәт казанышлары өчен Иршат Хәнифов тармак Мактау грамотасына, ТР Министрлар Кабинеты Рәхмәт хатына ия. Районның агросәнәгать комплексы үсешенә керткән хезмәт өлеше өчен һәм 55 яшьлек юбилее уңаеннан ТР Авыл хуҗалыгы министрлыгының Рәхмәтенә лаек булды.