Талантлы балаларны хуплады

Дәүләт Советы депутаты Шамил Яһудин шул көннәрдә Аксубайда гражданнарны кабул итте.

Район кешеләре депутат янына үзләренең ярдәмсез хәл итеп булмаслык олы бәлалары һәм вак-төяк проблемалары белән киләләр. Шунысы куанычлы, Шамил Габделхәй улы мөрәҗәгать итүчеләрнең күпчелегенә кабул итү бүлмәсендә үк ярдәм күрсәтте. Район Мәдәният йорты каршындагы вокал студиясенә йөрүче талантлы балаларның әти-әниләре финанс ярдәме сорап килгәннәр. Студиягә сигез яшьтән алып 17 яшькәчә 11бала йөри. Яшь җырчылар "Талантлар планетасы" фестиваленең берничә конкурс этабын үткәннәр. Санкт-Петербургта узачак суперфиналда җиңәсе генә калган. Бәйге биш көн дәвам итәчәк, ә анда яшәп тору өчен унике мең сумнан артык акча кирәк. Ата-аналарны депутатка мөрәҗәгать итәргә менә шул проблема мәҗбүр иткән дә инде. - Мин Аксубайдагы мәдәни вакыйгаларны күзәтеп барам, - дип билгеләп үтте Шамил Яһудин. - Әлеге төбәкнең талантларга бай икәнен яхшы беләм. Депутат яшь йолдызларга ярдәм итте һәм уңышлар теләде.