Сөлчә ярларын чистарталар

Узган җомга көнне иртәдән үк Сабан туе мәйданы тирәсендәге Сөлчә елгасы ярлары халык белән тулды.

Бюджет оешмалары - мәгариф, мәдәният бүлеге, спорт комплексы, ветстанция хезмәткәрләре бирегә мактаулы миссия - яр участокларын чүп-чардан чистарту өчен килделәр. Искәртәбез, бу 1 июльдән старт алган "Чиста яр" акцияләре кысаларында экологик десантның икенче тапкыр эшкә чыгуы. Ул мәктәп укучыларын, эшче яшьләрне һәм үзләренең кече ватаннары язмышына битараф булмаган авыл кешеләрен берләштереп, районның барлык авыл җирлекләрендә үтә.