Рөстәм Миңнеханов: Көчле төбәкләр генә Россияне көчле итә

С.Сәйдәшев исемендәге Зур Концертлар залында бишенче чакырылыш Татарстан Республикасы Дәүләт Советының 31нче утырышы үтте.

Бары тик көчле Россия белән генә безнең республиканың, татарларның уңышлы үсешенә гарант була алуына ышаныч бар. Бу хакта кичә Татарстан Президенты Рөстәм Миңнеханов Татарстанның Дәүләт Советына республиканың эчке һәм тышкы хәле турындагы еллык юлламасында белдерде. Бу - бишенче чакырылыш Татарстан Республикасы Дәүләт Советының утыз беренче утырышының көн кадагына куелган бердәнбер мәсьәлә.

"Дөньядагы каршылыклы үзгәрешләр, үсеп килүче хәвеф-хәтәрләр Россия Федерациясен күп халыкларының уртак йорты буларак ныгытуны таләп итә", - диде Рөстәм Миңнеханов. Ул Россия дәүләтендә күп гасырлар дәвамында татар, рус һәм башка этносларның рухи берлеген билгеләп узды. «Бүген Татарстан эре инвестицион социаль-икътисади, инфраструктур проектларны гамәлгә ашыра. Безнең республиканың казанышларын федераль үзәкнең, беренче чиратта, Россия Президенты Владимир Путинның куәтле ярдәменнән башка күз алдына китереп булмый", - дип белдерде Президент.

Татарстан Республикасы тотрыклы үсешен дәвам итә, күп кенә социаль-икътисади күрсәткечләре буенча ул лидерлар позициясендә, бизнес алып бару өчен кулай шартлар тудырыла. Соңгы ун елда без икътисадның нәтиҗәле базар моделен төзедек, лаеклы социаль стандартлар тәэмин иттек, кешеләрнең инициативаларын гамәлгә ашыру өчен шартлар тудырдык. Глобаль күренешләр, технологияләрнең тиз үзгәреше, базарның үзгәртеп корылышына, иҗтимагый үсеш трансформациясенә китерә. Без бу үзгәрешләрнең актив катнашучылары булырга, алдан күзаллап эш итәргә, гражданнарның тормыш сыйфатын арттыру турында уйларга тиеш.

Утырыш Татарстан Республикасы Гимны белән ачылды. Аның эшендә Татарстанның Дәүләт Советы рәисе Фәрит Мөхәммәтшин, Татарстанның Дәүләт киңәшчесе Минтимер Шәймиев, Татарстан Премьер-министры Алексей Песошин, Хөкүмәт әгъзалары, Федерация Советы әгъзалары, депутатлар, башка рәсми затлар катнашты.

"Татар-информ" Президент Юлламасын онлайн-трансляцияләде. Трансляцияне http://www.tatar-inform.ru/internet-tv/1785/ интернет-сылтамасы аша карап була.