Аксубайлылар яңа 2025 елны тылсымлы кар белән каршыладылар

Елның соңгы сәгатьләрендә Аксубай халкы һәм район кунаклары чыршы янында җыелды. Мәйдан өстендә күбәләктәй кар бөртекләре уйнады. Музыка яңгырады, район мәдәният йорты артистлары тамашачыларга үз җырларын бүләк иттеләр. Өлкәннәр белән бергә балалар да шатланыштылар, алар рәхәтләнеп таудан шуып уйнадылар.
Тантанада катнашучыларны район Башкарма комитеты җитәкчесе Алмаз Мингулов якынлашып килүче яңа ел белән котлады.

– 2024 ел кем өчендер якты, кем өчендер катлаулы булды, – диде ул. – Безнең барыбыз өчен дә бу ел махсус хәрби операциядә катнашучыларга, аларның гаиләләренә ярдәм итү елы булды. Якташларыбызга тынычлыкны сакларга ярдәм итүче эшкә өлеш керткәннәре өчен һәркемгә аерым рәхмәт әйтәсе килә. Ватанны саклау буенча үз бурычын үтәгән һәр сугышчыга рәхмәт белдерәсем килә.

Район Башкарма комитеты җитәкчесе халыкка иң изге теләкләрен җиткерде.

Аксубайлыларны якынлашып килүче ел белән ТР Дәүләт Советы депутаты Камил Гилманов котлады.

– Мин бик теләп туган районыма кайтам һәм бездә халыкның хезмәт сөючән булуына һәрвакыт гаҗәпләнәм. Без күп нәрсәне бергә үттек, төзедек, икмәк иктек. Нәтиҗәләр сөендерә. 2025 ел һәр гаиләгә бик күп шатлык-сөенечләр китерсен. Иң мөһиме – тынычлык урнашсын һәм егетләребез үз гаиләләренә әйләнеп кайтсын.

Узып баручы ел сәхнәсеннән гадәттәгечә Яңа ел алдыннан, кешеләргә шатлык бүләк итеп, үз предприятиеләрен, оешмаларын, авыл җирлекләрен бизәүче коллективлар билгеләп үтелә.

Район үзәге оешмалары һәм предприятиеләре арасында иң яхшы Яңа ел бизәлешенә бәйге йомгаклары буенча район Башкарма комитеты җитәкчесенең Мактау грамоталарына һәм акчалата премияләргә беренче урын өчен – «Татавтодор» АҖ филиалы, икенче урын өчен – Аксубай универсаль технологияләр техникумы, өченче урын өчен «Нежность» КЦСОН лаек булды.

Районның гомуми белем бирү учреждениеләре арасында беренче урын өчен – Аксубайның 3нче мәктәбе, икенче урын өчен – Советлар Союзы Герое Григорий Романов исемендәге Кәкре Күл урта мәктәбе, өченче урын өчен Иске Ильдеряк урта мәктәбе бүләкләнде.

Яңа ел бизәлеше буенча авыл җирлекләре арасында беренче урынны Урмандеево авыл җирлеге алды, икенче урында – Иске Ильдеряк, өченче урында Иске Кармәт авыл җирлекләре. Яңа ел бизәлеше буенча гран-при Сидул Ерыклы авылы клубына тапшырылды.

Бүләкләү тантанасы бәйрәмгә җыелучыларның бердәм алкышлары астында узды. Импровизацияләнгән сәхнәдән котлау сүзләре, изге теләкләр яңгырады. Әйлән-бәйлән һәм дискотека Яңа ел тантанасын дәвам итте.