68 ел – бер юлдан

"Гаилә, мәхәббәт һәм тугрылык көне" алдыннан Иске Тимошкино авылында гомер итүче Шишковлар өендә күңелле вакыйга булды.

Алар йортына мактаулы миссия белән районнан делегация килде.

- Хөрмәтле Николай Семенович һәм Надежда Максимовна, - дип өй хуҗаларына мөрәҗәгать итте район башкарма комитеты җитәкчесе урынбасары Сергей Александров. - Сез үрнәк гаилә пары. Озак еллар бер-берегезгә карата җылы, мәрхәмәтле мөнәсәбәттә булып, сез җәмгыятьтә югары абруй казандыгыз.

Якыннары, туганнары катнашында җылы алкышлар астында ул гаилә парына гөлләмә, "Мәхәббәт һәм тугрылык өчен" медален һәм район исеменнән истәлекле бүләк тапшырды.

- Сезне ихлас күңелдән Гаилә, мәхәббәт һәм тугрылык көне белән котлыйм, - дип мөрәҗәгать итте ЗАГС бүлеге җитәкчесе Елена Еграшкина тантана гаеплеләренә. - Сезнең гаилә тарихы, матур сөю хисләренең еллар үткәч тә сүнмәвен, сүрелмәвен дәлилли. Сезнең үзара мөнәсәбәтегез бик күп гаилә парлары өчен өлге булып тора. Иске Тимошкино авыл җирлеге башлыгы урынбасары Наталья Красильникова да пенсионерларга йөрәк түреннән чыккан җылы сүзләрен җиткерде. Ир белән хатынның мондый игътибар һәм кайгыртудан күңелләре нечкәрде.

Бу парны бер-берсенә булган дулкынландыргыч мөнәсәбәт аерып тора, алар бергә уздырган мизгелләрнең кадерен беләләр. Аларның яшьлеге кырыс сугыш елларына туры килә. Николай Семенович Иске Тимошкино авылында күп балалы гаиләдә дөньяга килә. 14 яшендә әнисез кала. Җиде сыйныфны тәмамлаганнан соң Аксубай педучилищесына укырга керә. Николайга белеме буенча эшләргә язмый, диплом алгач кына - фронтка китә. Ул кавалерия полкында лейтенант булып хезмәт итә, яралана, әсирлеккә эләгә, могҗиза белән генә исән кала. Сугыштан соң булачак хатыны белән Яңа Аксубай балалар йортында таныша, ул бирегә район мәгариф бүлеге тарафыннан математика укытучысы итеп җибәрелгән була. Николай Саврушта яшәүче рус кызының гаиләсе турында сөйләгәндә, әтисе улының тормыш иптәшен дөрес сайлавына шикләнми. Киленем белән ничек аралашырмын икән, дип кайгыра. Озын буйлы, чибәр Надежда бусаганы атлап кереп, чуашча исәнләшүгә үк, өлкән гаилә башлыгы кызның матур булуы өстенә, тапкыр һәм тәрбияле булуын да аңлый. Николай Семенович бу мизгелне гомере буена хәтерендә калдырган һәм кунакларга барлык нечкәлекләре белән сөйләп бирде. Ир белән хатын беренче тапкыр танышулары, шуннан соң Николайның төн йокылары качуы турында искә төшерде. Әмма элеккеге фронтовик беренче күрүдән үк кызда зур тәэсирләр уятмый. Бер хезмәт коллективында берничә ай бергә эшләгәннән соң гына сөйгән яры-хезмәттәшен үзенә карата.

Николай Семенович һәм Надежда Максимовна күп еллар Иске Тимошкино урта мәктәбендә хезмәт куялар. Берсе математика укытса, икенчесе - рус теленнән белем бирә. Бу мәктәпнең күп буын чыгарылыш укучылары өчен Шишковлар иң хөрмәткә лаек, яраткан укытучылар булып торалар.

Алар дүрт кыз тәрбияләп үстерәләр: Зинаида, Татьяна, Алевтина, Нина, аларга белем бирәләр. Чистайда яшәүче кызлары Татьяна, бүгенгесе көндә әти-әнисенең терәге, ярдәмчесе. Гаилә архивында гаилә фотолары белән бергә, куйган хезмәтләре өчен бирелгән күпсанлы Мактау грамоталары, орденнары, күкрәк билгеләре бар. Ләкин хезмәттәшләренең һәм якташларының игелекле мөгалләмәсе алар өчен бүләкнең иң зурысы. Шишковлар гаиләсе район һәм авыл кешеләренең ихтирам һәм хөрмәтен күптән яулады инде.