Вакансияләр булса да, эшсезләр күп

Аксубай районында эш белән тәэмин итү хезмәтендә 80 кеше теркәлгән. Бу икътисади яктан актив халык санының (13200 кеше) 0,58 процентын тәшкил итә.

- Районда 110 вакансия ачык, - дип билгеләп үтте эш белән тәэмин итү үзәге җитәкчесе Иван Маклаков. - Ләкин төрле сәбәпләр аркасында кешеләр әлеге тәкъдимнәрне кабул итә алмыйлар. Иң төп сәбәпләр арасында - махсус һөнәри белем булмау. Мисалга, районга табибләр кирәк, ә эшсезләр арасында профессиональ табибләр юк. Икенче сәбәп - җирлеккә бәйле. Без эшсезгә ул яшәгән торак пункттан 7 километр аралыкта эш тәкъдим итәбез. Кайберләрен хезмәткә түләү канәгатьләндерми.