Бүген районның төп мәктәпләрен тәмамлаучылар төп имтиханнарның берсен тапшыралар

Рус теленнән имтихан һәркем өчен мәҗбүри.

Укучыларны озата баручы укытучылар үз тәрбияләнүчеләренә соңгы үгет-нәсихәтләр бирделәр.

– Балалар өчен бик борчылам, – ди Иске Ибрай урта мәктәбе укытучысы Гөлфирә Хәйруллина. Алар – 16 кеше. Мин бит алар белән бишенче сыйныфтан бирле эшлим. Аларның бар да уңышлы булыр дип ышанам.

– Ә сез, укучылар, борчыласызмы? Үз-үзегезгә ышанасыңмы? Имтиханнарда сезне нәрсә көткәнен беләсезме, – дип кызыксындым Иске Татар Адәмсуы төп мәктәбен тәмамлаучылардан.

– Бераз, – дип җавап бирделәр кызлар. – Безгә тест узарга, кыскача инша язарга туры киләчәген беләбез.

Балалар имтихан тапшыручылар исемлеге янында җыелдылар.

– О! Йөз илле биш кеше, – диде аларның берсе. Һәм кинәт кенә кемнеңдер кесәсеннән кечкенә, гармун кебек төрелгән кәгазь кисәге төшеп калды. Шпаргалка... Яшүсмер югалып калды, ләкин аны идәннән күтәрде.

–Борчылма, бу бары тик синең имтиханнарга әзерләнгәнеңне генә күрсәтә, – дип тынычландырды аның янында торган остазы. – Иң мөһиме, аны монда калдырырга кирәк, аннан файдаланырга ярамый.

Иртәнге сәгать 9.00 да балаларны чиратлап металл детекторы аша үткәрә башладылар, анда журналистларны кертмәделәр.

– Сез монда керергә ярамый, – дип безне ишек төбендә үк туктатты мәгариф бүлеге баш белгече Гөлкәй Сәмигуллина.

Имтиханга балаларга үзләре белән ручка, эчәргә су һәм шоколад алырга рөхсәт иттеләр. Чөнки аларга аудиториядә өч сәгать 55 минут булырга туры киләчәк. Имтихан тапшырган кабинетка, телефон алып керергә рөхсәт ителми, контроль-үлчәү материалларын – КИМнарны фотога төшерү, дәреслекләр һәм башка белешмәлекләр куллану тыела.

–Төп дәүләт имтиханнары (шулай ук БДИ да) КИМнарын оештыручылар Интернет аша якланган каналлар аша алалар. Контроль бик җитди. Һәр аудиториядә видеокүзәтү оештырылган – видеокамералар урнаштырылган. Әгәр имтихан тапшыручы аудиториядән берничә тапкыр чыкса, шунда ук Рособрнадзор контроленә алыначак, – ди мәгариф бүлеге җитәкчесе Рәмзия Зәйдуллина. – Имтиханнарны кабул итүче педагоглар махсус укулар үттеләр. Аксубай урта мәктәбе базасында ППЭ җитәкчесе Алексей Буинский дәүләт имтиханнарын кабул итүне оештыруның барлык нечкәлекләрен белә. Шуңа күрә без тыныч. Әлегә барысы да планлаштырылган режимда бара. Минемчә, бүгенге имтихан да эксцессларсыз узачак.