Теркәлүсез бизнес ачкан өчен җәза бирелә

Салым хезмәте хәбәр иткәнчә, салым Кодексының 83 нче маддәсе 1 пункты нигезендә, эшмәкәрлек эшчәнлеге белән шөгыльләнүче физик затлар шәхси эшмәкәр сыйфатында теркәлергә һәм салым органына исәпкә басарга тиешләр.

Теркәлүсез бизнес алып бару, барыннан да элек, административ хокук бозу дип санала һәм моның өчен 500 сумнан алып 2000 сумга кадәр штраф салу каралган. Әмма салым Кодексында тагын да кырысрак санкцияләр каралган. Исәпкә басмыйча эшмәкәрлек эшчәнлеге алып барган өчен, эшчәнлектән кергән керемнең 10 проценты күләмендә штраф салына, моңа өстәп, аның минималь күләме 40 мең сум тәшкил итә. Теркәлүсез бизнес алып барган өчен җинаять җаваплылыгы да каралган, дип искәртә салым инспекторы Денис Миронкин.