Акчагызны һәм күршеләрегезне кызганыгыз

Бу атнада без өч көн ял итәчәкбез.

Кагыйдә буларак, районның күпчелек халкы ялларны бакчаларында үткәрәчәк. Уңышны җыеп алганнан соң-бакча-дачаларны да үсемлек сабакларыннан җыештырырга кирәк. Кемнәрдер боларның барысында чересен өчен өемнәргә өеп куя, башкалар чүп контейнерларына ташый, өченчеләре яндыра.

-Без чүп-чарны һәм коры үләннәрне яндыруга каршы даими көрәш алып барабыз,-дип сөйли Татарстан Республикасы янгын хезмәте Чистай отрядының Яңа Ибрай авылындагы аерым пост башлыгы Фәрит Нургатин. -Алдагы еллардагы тәҗрибәдән күренгәнчә, аерым гражданнар янгынга каршы иминлек кагыйдәләрен бозуларын дәвам итәләр. Үзләренең һәм күршеләренең йорт-җирләрен куркыныч астына куеп, бакчада чүп-чар яндыруны дәвам итәләр.

-Без әлеге кагыйдәне бозган өчен район халкын гына түгел, ә район авыл хуҗалыгы формированиеләрен һәм шулай ук урындагы затларны да җәзага тартачакбыз.-дип сөйли Россия МЧС УНД ГУның ТР Аксубай районы буенча ОНД башлыгы эчке хезмәт капитаны Рөстәм Гафиятов, -Бакчада үлән сабакларын, басу-кырларда камыл, салам калдыкларын да яндырырга ярамый. Физик затлар өчен дә, юридик затлар дә, шулай ук урындагы затлар өчен дә штрафлар каралган. Бәрәңге сабагын яндырган өчен гражданнарга - бер меңнән алып ике мең сумга кадәр, урындагы һәм физик затларга алты меңнән алып унбиш мең сумга кадәр штраф яный.

Үлән сабакларын медиклар да яндырырга киңәш итми. Аның төтене астма авырулы, аллергия булган, йөрәге чирле кешеләргә начар йогынты ясый. Менә шуның өчен акчагызны да кызганыгыз, күршеләрегез турында да онытмагыз.