Аксубаево
  • Рус Тат
  • Аксубай районында яшәүче хезмәт ветераны 90 яшьлек юбилеен билгеләп үтте 

    Хафизә Газизулла кызы Вәлиевага 90 яшь тулды.

    Язмыш аны озын гомерле генә түгел, ә кеше өчен теләсә кайсы яшьтә мөһим булган – җан җылысы, сәламәтлек һәм хәтер ныклыгы белән дә бүләкләгән. Хафизә Газизулла кызы үз тормышыннан барысын да хәтерли һәм сөйли ала. 

    Аның балачагы һәм яшьлеге Азнакай районында уза. Ул чордагы барлык яшьтәшләре кебек җидееллык мәктәпне тәмамлый, колхозда эшли. Авыр сугыш көннәрен әле дә хәтерли, бу хатирәләр аның күңелендә тирән эз калдырган. 

    – Бик авыр чорларны кичердек, – ди ветеран. – Ачлык үзәкләргә үтте. Үлән ашадык. Ул җитми иде, басудан черек бәрәңге җыйдык, аннан җәймә пешерә идек. Бала чактан ук басуда эшли башладык, эштән курыкмадык. Без моның илгә кирәклеген белдек, үз-үзебезне аямадык. 

    Сугыштан соң, 1950 елда ул Чиләбегә китә, төзелеш-монтаж идарәсендә эшли башлый. Авылда авыр эшкә ияләшкән сала кызын авыр төзүче хезмәте куркытмый. Биредә акча эшләү мөмкинлеге була. 

    Бу калада ул үзенең язмышы – Рус Кармәте авылыннан килгән егет белән очраша. Өйләнешәләр. Тату яшиләр, эшлиләр, биредә олы кызлары дөньяга килә. Әмма тормыш иптәше туган җирләренә кайту теләге белән яна – аның әнисенә калган балалары белән яшәве бик авыр була, әтиләре фронтта һәлак була. 1954 елның декабрендә гаилә Сабирҗан Харис улының туган ягына күченеп кайта. Яшь хатын җирле “Большевик” совхозына төрле эшче булып урнаша. 

    Хафизә Газизулла кызының калган гомере бу авылда узган. Авылдашлары белән тату яшиләр, бүген дә ул күңеленә якын булган авыл кешеләрен еш искә алып сөйли. Хафизә Газизулла кызы күп еллар сыер савучы, бозау караучы булып эшли, 1987 елда лаеклы ялга чыга. 

    Вәлиевлар ике кыз һәм бер ул тәрбияләп үстергәннәр. Ир белән хатын 66 ел тату гомер кичергәннәр. Берничә ел элек ире вафат булган, аны Казанга олы кызы алып киткән. 

    – Әти белән әни безнең өчен һәрвакыт гаилә мөнәсәбәтләре үрнәге булдылар, – дип билгеләп үтте ул. – Алар үзара аңлашып, тату яшәделәр. Әти юк инде. Әнинең исән, сәламәт һәм яхшы хәтерле булуы белән без бәхетле. Безгә гомер, җан җылысын, назын бүләк иткән өчен рәхмәтебез чиксез. 

    Юбилейны улы Әмирҗан йортында бөтен гаилә белән билгеләп үттеләр. Балалар, оныклар бу көнне яраткан әбиләре янында булдылар, чын бәйрәм оештырдылар. 

    Хафизә Газизулла кызын юбилее белән котларга Яңа Кармәт авыл җирлеге башлыгы Илнур Шакиров килде. Ул район файдасына күпьеллык нәтиҗәле хезмәте өчен бәйрәм сәбәпчесенә олы рәхмәт сүзләрен җиткерде. 

    – Сезнең авыл хуҗалыгын үстерүгә юнәлдерелгән хезмәтегез бәяләп бетергесез, – диде ул. – Сез фидакарьлек үрнәге. 

    Муниципаль берәмлек җитәкчесе юбилярга чәчәк бәйләме, истәлекле бүләк тапшырды, озын гомер, сәламәтлек теләде.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: