Уналты яшьлек тыл хезмәтчәне завод төзегән һәм фронт өчен агач әзерләгән

1946 ел. Ил сугыш нәтиҗәсендә җимерелгән халык хуҗалыгын торгызуга мохтаҗ була.

Төзелештәге авыр хезмәт кызлар кулы өчен булмый. Ахирәтләр пыяла җитештерүдә төп материал булган елга комын цехларга илтеп бушатканнар. Аннары заводтан әзер пыяла листларын төяп җибәргәннәр.

Тулай торак дип аталган ярым җимерек баракларда яшәгәннәр. Ачлык, салкын. Төннәрен Зинаиданың төшенә туган авылы Беловка, аның яшел болыннары һәм елгасы кереп йөдәтә.

Ә авылда кызларның кайтканнарын көтәләр. Алар кайтырга да өлгермиләр, өч иптәш кызы белән Зинаида Мурзихага урман эшкәртүгә китә.

Сезон тәмамлангач, урман кисүче кызлар өйләренә җәяү кайтырга чыгалар. Язгы чор була, көндезләрен кар эри, аякта чабата, кызлар дүрт көннән соң көч-хәл белән кайтып җитәләр. Җылынырга да өлгермиләр, аларны Иске Тимошкинога МТС – машина-трактор станциясе төзелешенә җибәрәләр. Алар балталарын пычкыга алыштыралар. Бу юлы аларга фундамент өчен имән бүкәннәре әзерләргә туры килә.

Ветеранның бөтен гомере ирләр хезмәтендә үтә. Ләкин Зинаида Ивановна үткәннәргә үкенми.

– Бүген мин бик күп хезмәт куйганым һәм теләсә нинди эшкә алынганым өчен яшимдер, мөгаен, – ди җиде бала анасы.

Алтысын ул, үзенең туган балалары кебек карап үстерә. Николай Селиванов белән бердәнбер кызы Марина да игелекле булып үсә.

Шулай килеп чыга ки, ул хезмәт белән мавыгып, кияүгә чыкмый кала. Фронтка киткән ирләрнең яртысы яу кырында ятып калганда, нинди кияү булсын инде?

Авыл участковые Николай Селиванов, хатыны вафат булганнан соң, өч кыз һәм өч малайны ялгызы үстерә. Аның белән бер урамда яшәүче Зинаида, әтиләре районда булган вакытта берсеннән-берсе кечкенә булган, ачлы-туклы көн күргән сабыйларга кызганмыйча карый алмый. Булдыра алганча, ул аларга ана назы бирергә, үзе әзерләгән ризык белән сыйларга тырыша. Һәм, күп балалы әти кеше аның кулын сорагач, шатлана – ниһаять, сабыйлар аның мәхәббәте белән җылыначак. Озакламый гаилә ишәя – уртак сабыйлары Марина дөньяга килә.

Зинаида Ивановнага 55 яшькә кадәр колхозда төрле эшләрдә эшләргә туры килә. Чөнки аны 50 яшендә күп балалы ана буларак пенсиягә җибәрмиләр – янәсе, аның бер генә кызы бар.

8 мартта тыл хезмәтчәне үзенең 97 яшьлек юбилеен билгеләп үтте.

–Хезмәтне яратыгыз һәм минем кебек озак яшәрсез, – ди Зинаида Ивановна.

Бөек Җиңүнең 80 еллыгы алдыннан район Башкарма комитеты җитәкчесе Алмаз Мингулов тыл ветераны Зинаида Ивановнага юбилей медален һәм республика Рәисе исеменнән истәлекле бүләк тапшырды.