Татарстанлыларны коронавирус йоктырмас өчен шәхси машинадан файдаланырга чакырдылар

Covid-19 коронавирусын кисәтү өчен Татарстанда яшәүчеләргә мөмкин булганча шәхси транспортка күчәргә тәкъдим иттеләр. Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе җитәкчесе урынбасары Любовь Авдонина «Татар-информ» агентлыгында узган матбугат конференциясендә шундый киңәш бирде.

«Без бер генә нәрсә киңәш итә алабыз: әгәр мөмкинлек бар икән, шәхси транспорттан файдаланыгыз. Автобусларның аз булуы аңлашыла, бәлки иртәрәк чыгып икенчесен көтәргәдер. Бу очракта нәрсә эшләргә икәнен әйтә алмыйм, берничә вариант бар», - диде спикер.

Шул ук вакытта, җәмәгать транспортында битлек кию мәҗбүри, диде Авдонина. Ул Эчке эшләр министрлыгы хезмәткәрләренең актив рәвештә рейдлар үткәрүен, пассажирларның битлек кигәнме-юкмы икәнлеген тикшерүен искәртте.

«Без барлык автотранспорт предприятиеләренә дә автобусларның рейска чыгу вакытын үтәргә тиешлеген таләп итеп күрсәтмәләр бирдек. Әмма биредә проблема шунда ки, автобус йөртүчеләр дә, кондукторлар да авырый. Шуңа бәйле рәвештә, линиягә автобуслар да аз чыгадыр. Әмма Транспорт һәм юл хуҗалыгы министрлыгы аша без әлеге теманы өйрәнәбез», - дип аңлатты Авдонина.

Чыганак: tatar-inform.tatar