Сезнең алда баш иябез, ашыгыч ярдәм машинасы йөртүчеләре!

Яңа коронавирус инфекциясенең таралуы ашыгыч медицина ярдәме күрсәтү хезмәте йөртүчеләре өчен дә сынау булды. Район үзәк хастаханәсе җитәкчесе билгеләп үткәнчә, пандемия башлану белән ашыгыч ярдәм машинасы йөртүчеләре дә, медиклар кебек үк, аның белән көрәштә алгы сызыкта торалар.

– Алар үз сәламәтлекләрен куркыныч астына куеп эшлиләр. Чакыру буенча чыгар алдыннан алар да шулай ук шәхси саклану чараларын кияләр, авыруларны район үзәк хастаханәсенә, рентген тикшерүләренә алып киләләр, ә пневмония ачыклана икән – авыруларны Чистайга томографиягә алып баралар, – дип сөйли Аксубай район үзәк хастаханәсе баш табибы Марсель Ислямов. – Кайчакта алар бер үк вакытта районның төрле юнәлешләре буенча чакыруларга чыккан, ә дежур машина Чистайда булган очраклар да була. Хәтта йөртүчеләрнең берсенең ялы булса да, кирәк булганда алар эшкә чыгалар. Пандемия башланганнан бирле, алар Чистайга гына ике йөз (!) тапкыр бардылар.

Районның баш табибы сүзләренең асылына төшенеп, ашыгыч ярдәм хезмәте йөртүчеләренең безнең заман геройлары булуын аңлыйсың.

Теләсә кайсы авыруның нәтиҗәсе күп очракта ашыгыч ярдәм машинасы йөртүчеләренең һөнәри осталыгына, аларның оператив эш итүенә бәйле.

Алар җитез эш итә белә, физик яктан нык булырга тиеш, чөнки аларга авыруларны ташырга, носилкаларда күтәреп йөртергә кирәк, шуның өстенә машина йөртү күнекмәләрен яхшы белү белән бергә, авыруларны транспортлауда барлык куркынычсызлык таләпләрен үтәргә кирәк. Ә юлда бер минутка соңаруның кеше гомере өзелүгә китерүен белгән машина йөртүче күңелендә нинди хисләр туганын ул үзе генә белә.

Автомобильчеләр көне алдыннан алар исемнәре белән аталуга лаек. Анатолий Беляков, Владимир Романов, Василий Краснов 30 елдан артык ашыгыч ярдәм машинасы йөртүчеләре булып эшлиләр. Андрей Сухалов, Виталий Алексеев, Сергей Михеев, Михаил Яковлев, Алексей Сапожников, Евгений Захаровларның да хезмәт стажлары аз түгел.

– Ашыгыч ярдәм хезмәте йөртүчеләре арасында кадрлар агымы юк. Алар барысы да үз һөнәрләренә тугры, ышанычлы кешеләр. Аларга иң мөһиме – сәламәтлек телисе килә, – дип теләде баш табиб Марсель Ислямов. – Алар сәламәтлекнең кыйммәтен башкаларга караганда яхшырак беләләр!