Гомер бәйрәме – 90 яшьлек юбилей

Иске Кыязлы авылыннан Мөхтәсимова Саймә Абдулла кызы 90 яшьлек чикне узды

Саймә Абдулла кызын котларга һәм күпьеллык хезмәте өчен рәхмәт һәм хөрмәт сүзләрен җиткерергә, истәлекле бүләкләр тапшырырга район башлыгы урынбасары Илшат Заһидуллин килде. Ул юбилярга җан тынычлыгы һәм күңел күтәренкелеге теләп, район Башкарма комитеты җитәкчесенең Рәхмәт хатын, гөлләмә, истәлекле бүләк тапшырды.

Иске Кыязлы авыл җирлеге башлыгы Газинур Дәүләтшин да тантана сәбәпчесенә ныклы сәламәтлек, киләчәктә дә балаларының игътибарын күреп, яңа туган һәр көнгә сөенеп яшәвен теләде.

Бәйрәм көнне балалары гаиләләре белән кайтканнар иде. Алар газиз кешеләре өчен бәйрәм табыны әзерләгәннәр, аңа үзләренең йөрәк түреннән чыккан ихлас теләкләрен, әниләренең янәшәдә булуына сөенечләрен белдерделәр.

Саймә Абдулла кызы 1935 елнын 21 мартында шушы авылда, күпбалалы гаиләдә дүртенче бала булып дөньяга килә. Юбилярыбызның тормыш юлы җиңел генә узмаган, бала, үсмер чагы авыр сугыш һәм сугыштан соң елларга туры килә. Авыл мәктәбенең җиденче сыйныфын тәмамлый. 14 яшеннән колхозда сарыклар, бозаулар фермасында эшли башлый. Гомере буена колхозда фидакарь хезмәт куеп лаеклы ялга чыга.

1960 елда Минәсхать Минәхмәт улы белән гаилә коралар, 6 бала тәрбияләп үстерәләр. Кызганычка каршы, ата белән анага улларын югалту ачысын күрергә язган була. Калган балаларының бүгенгесе көндә гаиләләре белән бәхетле яшәүләре шатландыра аларны. Быел аларның тормыш юлыннан иңгә-иң куеп атлауларына 65 ел тула. Ветераннар 10 оныкларына һәм 9 оныкчыкларына сөенеп яшиләр.

Авыл халкы Саймә апаны һәркемгә ачык күңелле, ярдәмчел булганы өчен хөрмәт итә.

Әби белән бабай бүген төпчек уллары Фәрхат тәрбиясендә яшиләр. Калган балалары кайтып хәлләрен белеп, йорт эшләрендә ярдәм итеп торалар.

–И, балакайларым, мине олылап килгәнегез өчен Аллаһының рәхмәтләре яусын, исәнлектә, тигезлектә гомер итегез. Без күргән михнәтләрне сезгә күрергә язмасын, – дип рәхмәтләр укып озатып калды Саймә әбекәй рәсми кунакларны.