Фронт өчен гимнастеркалар теккән

Юбиляр әбине йортта яшәүче  бөтен кеше, интернат директоры һәм башкарма комитет җитәкчесе урынбасары Сергей Александров котладылар. Аның юбилее нәкъ менә елның иң зур бәйрәме – Өлкәннәр көненә туры килде. Нина Ивановна котлауларга, Россия Президенты Владимир Путиннан адреслы тәбрикләү хатына сабыйларча сөенде.

Юбиляр интернат-йортта 2007 елдан бирле яши. Һәм ул аның өчен – туган йортына, ә биредә яшәүчеләр һәм коллектив туган гаиләсенә әверелгән. Тумышы белән ул Апас районыннан, тормышта булган, Свияжск шәһәрендә яшәгән.

– Сугыш елларында Мәскәүдә туку фабрикасында өс киемнәре  – гимнастеркалар, ир-ат күлмәкләре тегү буенча оста булып эшләдем.  Ул вакытта бер генә: “Барысы да фронт өчен – барысы да Җиңү өчен!“ шигаре астында хезмәт куйдык, – дип искә алды юбиляр.

Нина Ивановна яулыклар да чиккән, модадан калышырга теләмәгән хатын-кызлар аңа чират торган хәтта.

Сугыш елларында куйган фидакарь хезмәте өчен бирелгән тыл хезмәтчәне исемен зур горурлык белән билгеләп үтте ул. Аның хезмәт стажы – 31 ел.
Язмыш кушуы буенча, Нина Ивановна олыгайган көнендә интернат-йортта яши башлый, баштан – Тәтештә, аннары Аксубай районында. Авыруы сәбәпле ике аяксыз кала, инвалид коляскасында гына хәрәкәт итә.

–  Ул бүген дә, элеккеге кебек, көчле рухлы, актив, изге күңелле, – дип билгеләп үтте социаль учреждение директоры Рузилә Бәширова. – Нина Ивановна интернатта үткәрелгән барлык мәдәни-ял итү чараларында катнаша һәм үзенең позитив энергиясен әйләнә-тирәдәгеләргә дә өләшә.