Бөек Ватан сугышы ветераны Нина Телешева район җитәкчелеге исеменнән Халыкара хатын-кызлар көне белән котлаулар кабул итте

Район җитәкчелеге күңелле вакыйгалар – истәлекле даталар белән котлау, бүләкләр тапшыру өчен Телешевлар йортында еш була. Һәр очрашу истәлекле һәм күңелдә матур эзләр калдыра. Хатын-кызлар бәйрәме алдыннан да район башлыгы Камил Гилманов Нина Александровна янында булды. Ул чын күңелдән ветеранны Халыкара хатын-кызлар көне белән котлады, чәчәк бәйләме, бүләк тапшырды.

– Сезне сәламәт һәм күтәренке рухта күрүемә бик шатмын, – диде ул. – Чын күңелдән сезгә сәламәтлек, яз кәефе телим.

Фронтовикны бәйрәм белән мәдәният бүлеге мөдире Алексей Тимирясов та тәбрикләде, озак елларга сәламәтлек һәм иминлек теләде.