Ата-бабалар истәлегенә

Аларны күршеләргә хас мөнәсәбәт кенә берләштерми, шулай ук тарих та. Кырыгынчы еллар башына кадәр Иске Кармәт авылы кешеләренең мәетләрен Рус Кармәте зиратына җирләгәннәр. Өлкән буын кешеләре моны хәтерли.

Авыл активлары Рус Кармәте зиратында җирләнгән ата-бабалары истәлегенә искә алу тәресе куярга карар иткәннәр. Бу православие символын авыл кешесе Николай Михайлов белән ясаганнар. Якшәмбе көнне чиркәүдә гыйбадәт кылганнан соң, Рус Кармәте зиратына Иске һәм Рус Кармәте авыллары халкы – биредә җирләнгән кешеләрнең нәсел дәвамчылары җыелды.

Аксубай православие чиркәве рухание Иоанн мәрхүмнәр рухына гыйбадәт кылды. Гыйбадәт кылу тәмамланганнан соң тәрене урнаштырдылар һәм аны изгеләндерделәр.

Истәлек тәресе урнаштыру уңаеннан җыелучыларга Иске Кармәт авыл җирлеге башкарма комитеты җитәкчесе урынбасары Дамир Миңнеханов мөрәҗәгать итте.

– Якташларыбызның вафатыннан соң ничәмә-ничә еллар узуына карамастан, без аларны онытмаска тиеш, – дип билгеләп үтте ул. Җирле хакимият вәкиле әлеге игелекле эштә катнашканнары өчен барысына да рәхмәт әйтте. – Без, Иске Кармәт авылы кешеләре өчен, бу вакыйга зур әһәмиткә ия, – диде истәлек тәресен урнаштыру инициативасы белән чыккан төркем вәкиле Анатолий Трофимов. – Бу – ата-бабаларыбызга ихтирам һәм алар турындагы истәлекне саклау билгесе.