Александр Лодоркин тәрбияләнүчеләре Бөтенроссия ярышларында көмеш медаль яулады
Аксубай тренеры Александр Лодоркин футболчылары командасы Самара шәһәрендә узган Бөтенроссия ярышларында катнашты.
Беренче раундта “Аксу” (Аксубай) командасы ”Кошелев сити” (Самара) командасын 2:0 исәбе белән җиңде, икенче уенда, кызганычка каршы, “Газовик “ (Петровск) командасына 0:3 исәбе белән оттырды. Әмма өченче уенда безнең егетләр “Талант” (Бөгелмә) командасын 6:0 исәбе белән җиңделәр.
Нәтиҗәдә, “Аксу” командасы төркемдә икенче урынны алды һәм финалга чыкты, анда “Лидер” командасын 2:1 исәбе белән җиңүгә иреште, Уфа командасын да 3:1 исәбе белән җиңде. Әмма өченче, хәлиткеч уенда Аксубай футболчылары “Кошелеф сити” хуҗалары командасына 0:1 исәбе белән оттырды. Нәтиҗәдә, Бөтенроссия ярышларының көмеш медальләрен яуладылар!
Бу малайлар өчен дә, тренер өчен дә, яшь футболчыларның әти-әниләре өчен дә зур уңыш.
Балалар зур шәһәрләр командаларын җиңәргә сәләтле булуларын күрсәттеләр. Һәм алар, һичшиксез, исемнәре атап үтелүгә лаек. Болар - Роман Саттаров, Данил Семенов, Рүзәл Сәйфуллин, Роман Степанов, Игнат Кондрашев, Самат Шәфигуллин, Кирилл Лукин, Семен Николаев, Матвей Лодоркин, Ярослав Шафеев.
Тренер билгеләп үткәнчә, бу сәфәр малайларның әти-әниләренең финанс ярдәменнән башка узмас иде. Һәм аларга яшь чемпионнарны тәрбияләүдә аңлау һәм үзара ярдәм күрсәткәннәре өчен чын күңелдән рәхмәт белдерә.
Фото: яшьләр эшләре һәм спорт бүлеге архивыннан алынды.
Следите за самым важным и интересным в Telegram-каналеТатмедиа
Нет комментариев