Алар иҗатта да көчле

Тамашачы үзәк хастаханә хезмәткәрләренең хисап концертларын сиксәненче еллардан бирле тамаша кыла. Соңгы елларда алар аеруча уңышлы чыгыш ясый башладылар. Ә  быелгы Татарстан АССР оешуга 100 ел тулуга багышланган “Мин яратам сине, Татарстан!” программасында табиблар яңа яктан ачылдылар.

Программаның эчтәлеге, сәхнә куелышы, башкару осталыгы – барысы да югары дәрәҗәдә иде. Берсен-берсе тулыландырып, алыштырып торган матур лирик җырлар, дәртле биюләр, театральләштерелгән тормышчан  вакыйгаларның барысын да медицина хезмәткәрләре зур осталык белән ихластан башкардылар. Тамашачылар һәр номерны көчле алкышлар белән каршы алдылар, ә концерт ахырында чыгыш ясаучыларны аягүрә басып алкышладылар.  Үзенең тату иҗади командасына баш табиб Рөстәм Әхмәтшин рәхмәт белдерде. 

– Бу программаны әзерләгәндә без тамашачы белән очрашуыбыз якты истәлек булып калсын дип тырыштык. Безне шулай җылы кабул иткәнегез өчен сезгә зур рәхмәт, - диде ул. Табиб-артистларны уңышлары белән район мәдәният бүлеге начальнигы  Алексей Тимирясов та котлады. – Район хастаханәсе коллективы талантлы кешеләргә бик бай. Аларны сәхнәдә ешрак күрергә насыйп булсын иде, - диде ул. 

Табиблар кешеләрне дарулар белән генә дәвалап калмыйча, аларга  шулай яхшы кәеф тә бүләк итәләр. Ә бу, үз чиратында,  авыруга бирешмәскә шифа булып тора.