Аксубайлыларга быел яз су басу куркынычы янаган урыннарда хәтта резин итек кияргә дә туры килмәде

Язгы ташу янаган очракта Сөлчә, Демьян Бедный, Яр буе урамнарында  яшәүчеләргә шактый проблемалар китергән булыр иде. Без бу хакта күп тапкыр яздык һәм язгы ташуга каршы чаралар күрелгән урынга да берничә тапкыр бардык. Шөкер, язгы ташу безне урап узды.

– Безнең мөрәҗәгатьне ишетүегез,  аңлавыгыз өчен зур рәхмәт. Чөнки су февраль аенда ук күтәрелә башлады, әгәр чаралар күрелмәсә, безне, һичшиксез, су баскан булыр иде, – дип сөйләделәр редакциягә шалтыраткан җирле халык. – Район хакимиятендә безнең проблемага җитди караулары бик тә куанычлы, район башлыгы Камил Гилманов, башкарма комитет җитәкчесе Станислав Зайцев су басу куркынычы булган урынга  берничә тапкыр килделәр. Эшләр белән  шәһәр тибындагы Аксубай бистәсе башлыгы урынбасары Владимир Коннов, Башкарма комитет җитәкчесе урынбасары Илдар Ислямов җитәкчелек итте.

Авыр техника да эшләде. Нәтиҗәдә, җирлекнең хәтта сазлыклы булуына да карамастан, чөнки монда язгы ташу котылгысыз, су күпләрнең  идән астына да кермәде.

Яшьрәкләр, су баса калса, берничә көн өйдә утырырга исәп тоткан идек, дип шаярткан булсалар да, нәтиҗәдә, резин итекләрдән дә файдаланмадылар.