Аксубайлылар урманнарны чистарту буенча табигатьне саклау акциясенә кушылдылар 

Апрель аеннан Татарстанда “Татарстанның чиста урманнары” табигать саклау акциясенең чираттагы этабы бара. Аксубайлылар ел саен урманнан кубометрлап көнкүреш чүп-чарын чыгарып, актив катнашалар. Бу юлы акциянең язгы этабы кысаларында Чабаксар участок урманчылыгы территориясен чистартуга Аксубай урманчылыгы, урман хуҗалыгы, Чабаксар участогы, “Ак БАРС Страхование”, “Ак БАРС-Мед” оешмалары, Иске Кармәт авыл җирлеге, Иске Кармәт авыл мәдәният йорты, авыл китапханәсе һәм Хәсән Туфан музей-йорты хезмәткәрләре чыкты. Волонтерлар бик зур эш башкарды. Алар төрле юнәлешләр буенча урман буйлары буенча таралып, юлчылар, “табигать сөючеләр” калдырган чүп-чарны җыеп, полигонга төяп җибәрделәр. Югарыда телгә алынган оешма вәкилләре әлеге территорияне узган елның язында да чистарттылар. Бер ел узды һәм урманда кабат күпме чүп-чар. Табигатьтә кешеләр үзләрен бик тәртипсез тоталар. 

Урман хезмәткәрләре шулай ук, автотрассадан яшь, яшел агачлар гына күренеп торсын өчен, корыган агачларны кисеп, пөхтә итеп җыештырып куйдылар. 

– Акция дәвам итә. Анда әйләнә-тирә мохитнең иминлеге өчен борчылган барлык гражданнар да катнаша ала, – ди Аксубай урманчылыгы җитәкче-урманчысы Андрей Илмухин. – Катнашучылар күбрәк булган саен, урманнар да чистарак булачак. Катнашу турындагы тәкъдимнәр белән урманчылыкка мөрәҗәгать итәргә яки (8 843-44) 2-73-53 номеры буенча урман бүлегенә шалтыратырга мөмкин.