Аксубайлылар Пасха бәйрәмен каршы алдылар

Аксубайның дин тотучылары һәм район кунаклары традицион рәвештә гыйбадәтләр кылып, якты пасханы каршы алу һәм бәйрәм шатлыгын уртаклашу өчен, изге Феодосий Тотемский чиркәвендә җыелдылар.

Төнге уникенче яртыда кыңгырауларда чаң сугылуы якты бәйрәм башлануы турында хәбәр итте.

Бәйрәм гыйбадәтен Аксубай православие чиркәве башлыгы протоиерей Александр Качаев җитәкләде. Чиркәү хорының чыгышы гыйбадәтханә эчендә аеруча тантаналы, күңелгә үтеп керерлек мохит тудырды.

Төн уртасында гыйбадәт кылуда катнашучылар чаң чыңлавы һәм пасха җырлары астында кулларына иконалар, янып торган шәмнәр тотып чиркәү тирәли тәре йөреше ясадылар. Бу – Пасха гыйбадәтенең аеруча дулкынландыргыч өлеше булды. Тәре йөрешендә катнашу һәр православие динен тотучы кеше өчен – зур һәм шатлыклы вакыйга: гыйбадәтханә тирәсендә тантаналы йөреш Христосны яңадан торгызу турындагы изге хәбәрне каршылауны гәүдәләндерә.

– Христос яңадан туды! – диде Александр Качаев.

Шул ук сүзләрне ул чуаш телендә дә кабатлады, чөнки мәхәллә әгъзаларының күпчелеге чуашлар һәм алар үз телләрендә җавап бирделәр. Рухани барысын да изге су белән аруландырды.

Пасха – кешеләргә сөенеч өләшә торган бәйрәм. Православие динен тотучы халыкларның өйләрендә бу көнне аерым кунакчыллык һәм шәфкатьлелек мохите хөкем сөрә.

Феодосий Тотемский гыйбадәтханәсендә Пасха гыйбадәтләре иртә таңга кадәр дәвам итә.