Аксубай ветераны гомерен авыл хуҗалыгына багышлаган

Ветеранны юбилее белән котларга районнан рәсми делегация килде.

– Хөрмәтле Агафия Лаврентьевна, ихлас күңелдән сезне 90 яшь тулу белән котлыйм, – дип мөрәҗәгать итте тантанада катнашучыга район Башкарма комитеты җитәкчесе Алмаз Мингулов. – Сез ил өчен иң авыр чорларны кичергән буын вәкиле. Сезнең өлешкә Бөек Ватан сугышы, җимереклек, ачлык, мохтаҗлык туры килде. Әмма Сез район, республика, ил иминлеге өчен тырышып хезмәт куйгансыз. Сезгә чын күңелдән сәламәтлек, бәхет, иминлек телим!

Агафия Лаврентьевна адресына район башлыгы урынбасары Илшат Заһидуллин тәбрикләү сүзләре җиткерде. Трудолюбово авыл җирлеге башлыгы Светлана Тарасова да тантана сәбәпчесен чын күңелдән тәбрик итте.

– Сез колхозда фидакарь хезмәт куйгансыз, кайгыртучан әни булгансыз, ике баланы ялгызы аякка бастыргансыз, – диде ул. – Алар җәмгыятькә файдалы, яхшы кешеләр булдылар. Хәзер алар сезне карыйлар, үзләренең җан җылыларын, шәфкатьләрен сезгә бирәләр. Котлаулары өчен ветеран чын күңеленнән рәхмәт белдерде. 90 яшьтә ул актив, әмма хәтере начарланган. Шуңа да карамастан, юбиляр узган гомер елларын хәтерли.

Агафия Лаврентьевна тумышы белән Иске Кармәт авылыннан. Нәкъ сугыш алдыннан гаилә Октябрь авылына күчеп килгәндә аңа алты яшь була. Әтисе фронтка китә. 1944 елда кайта – авыр җәрәхәтләре аркасында комиссовать итәләр. Кыз яшьли колхозда эшли башлый. Ул бөтен хезмәт гомерен авыл хуҗалыгына багышлаган. Күп еллар терлекчелектә эшләгән. Хезмәттәге казанышлары өчен бүләкләргә ия булган. Бертуганнарыннан бу якты дөньяда беркем дә калмаган инде. Иң якыннары улы Александр һәм кызы Антонина – әбекәйнең терәге. Кызы, әнисен карау өчен, лаеклы ялга чыгып, шәһәрдән кайткан. Гаиләдә якын кешеләре үзен яхшы хис итсен һәм күңел тынычлыгында яшәсен өчен бөтен шартларны тудырганнар.