Аксубай ветераны 90 яшендә дә һәрвакыт эш белән мәшгуль булырга тырыша

Асия Гаяз кызы Яңа Ибрай авылында туып-үсә, җиде сыйныфны бетергәч, колхозда төрле эшләрдә эшли.

Зур апасы Пермьдә эшли торган була, 1955 елда Асия дә бераз өс-башын карар, әти-әнисенә ярдәм итәр өчен, Пермь шәһәренә акча эшләргә китә. Асия анда җиде ел заводта хезмәт куя.

Әмма ничек кенә булмасын, туган як, кече ватан үзенә тарта, Асия авылга кайтырга була. Колхозда аны биш куллап эшкә алалар, чөнки ул тырыш, башкаручан була. Озакламый тормышка чыга. Тормыш иптәше Гаяз Дәрҗеман улы белән өч кыз – Розалия, Разыя, Резидәне үз үрнәкләрендә эш сөючән, тәртипле итеп тәрбияләп үстерәләр. Гаилә нык һәм тату була. Ире колхозда алдынгы тракторчы була. Асия Гаяз кызының хезмәт биографиясендә авылда бала тудыру йортында эшләгән, клубта җыештыручы булып эшләгән еллар да бар.

Ветеран үз яшеннән күпкә яшьрәк һәм җитезрәк күренә, күзләр генә тимәсен. Соңгы елларда кыш чыгарга кызлары алып китсәләр дә, ул яз башыннан алып көз уртасына кадәр үз йортына кайтып тора, һәрвакыт хәрәкәттә булырга тырыша. Асия әби биш оныгы һәм тугыз оныкчыгының бәхетле әбисе, дәү әнисе.

– Әни бакчада без утыртып киткән яшелчәләргә җәй буе су сибеп, чүпләрен утап тора, коммуналь хезмәтләр өчен түләүләрне дә үзе почтага кадәр барып башкарып кайта, – диләр ветеранның кызлары. – Без әниебезнең хәрәкәттә булуына сөенеп кенә торабыз.

Тантана сәбәпчесе рәсми кунакларны ишек төбеннән үк шатланып каршы алды. Асия Гаяз кызы истәлекле туган көнендә район башлыгы урынбасары Илшат Заһидуллин һәм авыл җирлеге башлыгы Фәһим Кәбировтан ил, республика һәм район иминлеге өчен куйган фидакарь хезмәте өчен ихлас рәхмәт сүзләре, изге теләкләр, истәлекле бүләк һәм чәчәкләр кабул итте. Хакимият вәкиле шулай ук тантана сәбәпчесенә район Башкарма комитеты җитәкчесенең Рәхмәт хатын ирештерде.

Асия Гаяз кызы яшь буын – “Беренчеләр хәрәкәте” оешмасы вәкиле Дмитрий Яшаковтан да җылы котлаулар кабул итте.