Аксубай укучылары авыл хуҗалыгы техникасы белән таныштылар

Бу сыйныфта киләчәктә тормышларын авыл хуҗалыгы белән бәйле һөнәр белән бәйләргә җыенган балалар белем ала. Аларга язгы кыр эшләренә нинди техника чыгачагы кызыклы иде. Һәм боларның барысын да алар авыл хуҗалыгының үзәк базасында үз күзләре белән күрделәр.

Төрле модификациядәге тракторлар, үзйөрешле машиналар, агрегатлар, зур йөк автомобильләре – бөтен техника әзерлек линейкасында торды. Бу көнне республика комиссиясе техниканың кыр эшләренә әзерлеген тикшерде. Малайлар һәм кызлар туфрак эшкәртү техникасын, ашлама сиптерү агрегатларын һәм чәчкечләрне кызыксынып карадылар. Авыл хуҗалыгы белгечләре аларга кырда үзләренең нинди операцияләр башкарулары турында сөйләделәр.

Агросыйныф укучылары белән комиссия әгъзалары – ТР Авыл хуҗалыгы һәм азык-төлек министрлыгының АПКны инженер-техник тәэмин итү бүлеге җитәкчесе Илнар Габбасов, район авыл хуҗалыгы идарәсе җитәкчесе Борис Соломонов очрашты.

– Авыл хуҗалыгы белән бәйле белгечлекләр күп һәм бу һөнәрләргә һәрвакыт ихтыяҗ бар, – дип билгеләп үттеләр алар. – Үсемлекчелек һәм игенчелек – бик мөһим тармаклар, алар үсә. Бүгенге хезмәтчәннәр заманча техникада эшлиләр, югары нәтиҗәләргә ирешәләр.

Балалар мәйданчыкта күргән техникадан һәм хезмәтләре авыл хуҗалыгын үстерүгә багышланган кешеләр белән аралашудан зур тәэсирләр алдылар.