Мәктәпне тәмамлаучы бүгенге укучыларга махсус операциянең әһәмияте турында сөйләде

Кыска вакытлы ялда булган махсус хәрби операциядә катнашучы Батырлык дәресендә укучылар алдында чыгыш ясап, сугыш көннәре, полкташларының батырлыклары, заманча сугышта кулланыла торган техника, армиядәге үзара ярдәм турында сөйләде.

– Авылның, мәктәпнең горурлыгы булган Фәнис махсус хәрби операция зонасына 2022 елның сентябрендә өлешчә мобилизация кысаларында чакырылды, – дип сөйләде мәктәп директоры Энҗе Хәйретдинова. – Әлегә ул туган авылында кыска вакытлы ялда.

Сугышчы, махсус хәрби операциянең әһәмиятен һәм ролен ассызыклап, авырлыкларны һәм кыенлыкларны җиңәргә якташларның ярдәме булыша, дип билгеләп үтте. Кунак ассызыклаганча, ул анда, алгы сызыкта, җиңүгә ышаныч кебек үк, аерым кискен сизелә. Фәнис шулай ук, Ватан алдындагы гражданлык һәм сугышчан бурычны үтәргә, армиядә хезмәт итәргә кирәклеген билгеләп үтте.

Егетләрне бигрәк тә махсус операция шартларында солдатларның көнкүреше, Россия гаскәрләренең хәрби коралланышы һәм сугышчан хәрәкәтләр кызыксындырды. Фәнис укучыларга волонтерлар артыннан юлланган хатлар һәм открыткалар өчен рәхмәт әйтте. Хатларны анда зур дулкынлану белән укыйлар һәм кадерләп саклыйлар.

– Сезнең хатларыгыз безнең өчен талисман кебек кадерле, – дип уртаклашты сугышчы.

Батырлык дәресендә Фәнис белән бергә аның тормыш иптәше, волонтер Ләйсән Мортазина да катнашты.