Аксубай районы мәктәпләрендә Соңгы кыңгырау чыңлады
Аксубай районының мәгариф учреждениеләрендә соңгы кыңгырауга багышланган тантаналы чаралар узды.
2 нче мәктәптә педагогик коллектив һәм ата-аналар белән бергә район башлыгы Камил Гилманов, мәгариф бүлеге җитәкчесе Рәмзия Зәйдуллина һәм район газетасының баш мөхәррире Людмила Жаренова чыгарылыш укучыларын мөстәкыйль томыш юлына озаттылар.
Соңгы кыңгырауга мәктәпнең элеккеге директорларын, педагогика ветераннарын – остазларны чакырдылар, аларга чәчәкләр бүләк иттеләр, күпьеллык эшләре өчен рәхмәт сүзләре җиткерделәр.
– Бөтен педагогик коллектив исеменнән сезне уку елы тәмамлану белән котларга рөхсәт итегез, – дип сәламләде чыгарылыш сыйныф укучыларын мәктәп директоры, укытучы һәм остаз Энҗе Туктарова. – Җаннарыгызның шатлыктан һәм моңсулыктан ничек дулкынлануын аңлыйм. Мәктәп еллары бик тиз уза, әмма сез аны лаеклы үттегез.
Ул чыгарылыш сыйныф укучыларына ярдәмнәре, конкурсларда, олимпиадаларда, конференцияләрдә катнашулары һәм җиңүләре өчен рәхмәт белдерде. Балаларның мәктәп данын лаеклы тәкъдим итүләрен билгеләп, имтиханнарны уңышлы тапшыруларын теләде.
Район башлыгы Камил Гилманов чыгарылыш сыйныф укучыларына аталарча үгет-нәсихәт бирде, районда балаларның уңышлы үсеше өчен күп эшләр башкарылуын, районның үсеш алуын һәм чәчәк атуын искәртеп үтте.
– Сезнең алда, кадерле чыгарылыш сыйныф укучылары, җаваплы чор – чыгарылыш имтиханнарын тапшыру тора. Барысы да уңышлы булыр дип уйлыйм, – диде Камил Гилманов. – Әти-әниләрегезгә һәм укытучы-остазларыгызга уку еллары дәвамында сезнең янәшәдә булулары һәм сезгә һәрнәрсәдә ярдәм итүләре өчен рәхмәт белдерәсем килә. Сезнең мәктәп – районда иң яхшыларның берсе, биредә көчле педагоглар коллективы һәм алар көчле җитәкчеләрнең берсе – мәктәпнең элеккеге директоры Әминә Кәрим кызы Вәлиуллина нигез салган традицияләрне дәвам итә.
Район башлыгы мәгариф бүлеге җитәкчесе Рәмзия Зәйдуллина йөзендә район педагогларына үсеп килүче буынны тәрбияләү эшендә көндәлек хезмәтләре өчен рәхмәт белдерде. Һәм мәктәпне тәмамлаучыларга югары уку йортларын тәмамлаганнан соң районга кайтырга чакыру белән мөрәҗәгать итте, бу елларда район тагын да матуррак булачак дип вәгъдә итте.
Камил Гилманов мәктәп укучыларын Җиңү көненә багышланган тантаналы чарага әзерләгәне өчен мәктәп укытучысы Николай Никитинга Рәхмәт хаты тапшырды. Ул шулай ук РВСН ветераннарының иҗтимагый оешмасы исеменнән педагогика ветераны Павел Крюков кулыннан Рәхмәт хатына лаек булды.
– Бүген беренче, тугызынчы һәм унберенче сыйныф укучылары өчен Соңгы кыңгырау чыңлый. Беренче сыйныф укучылары өчен – беренче мәктәп каникуллары, ә чыгарылыш укучылары өчен – дәүләт имтиханнарын тапшыруның катлаулы, җаваплы чор, – диде район мәгариф бүлеге җитәкчесе Рәмзия Зәйдуллина. – Без барыбыз да – әти-әниләр, укытучылар сезнең өчен борчылабыз. Ләкин, минемчә, без барлык авырлыкларны җиңеп, дәүләт имтиханнарын уңышлы тапшырачакбыз.
Укучыларга 1995 елда әлеге мәктәпне тәмамлаган Людмила Жаренова да киңәшләрен бирде. Ул конкурслар, олимпиадалар һәм конференцияләр нәтиҗәләре буенча 2023 елның иң яхшы чыгарылыш укучысына, шулай ук берничә тапкыр район газетасы призына шахмат турнирында катнашкан һәм җиңү яулаган Илсаф Даутовка исемле премия тапшырды. Чыгарылыш укучылары өчен ишекләре һәрвакыт ачык булган мәктәп җитәкчелегенә һәм педагогика коллективына рәхмәт белдерде.
Педагогика ветераннары исеменнән бәйрәмнең хөрмәтле кунаклары – мәктәпнең элеккеге директорлары Геннадий Леонтьев һәм Әминә Вәлиуллина чыгарылыш сыйныф укучыларына үгет-нәсыйхәтләр бирделәр һәм коллективка рәхмәт белдерделәр. Мәктәп остазларга җавап итеп аларның чыгышын көчле алкышларга күмде һәм чәчәкләр бүләк итте.
Чыгарылыш сыйныф укучыларына беренче укытучылары, сыйныф җитәкчеләре һәм беренче сыйныф укучылары, ата-аналар котлау сүзләрен җиткерделәр.
Бәйрәм дәвамында чыгарылыш укучылары игътибар үзәгендә булдылар – җырладылар, биеделәр һәм мәктәпкә, укытучыларга, ата-аналарга рәхмәтләрен белдерделәр.
Укучылар вальс әйләнделәр. Соңгы кыңгырау яңгырады. Чыгарылыш сыйныф укучылары, ак юл сезгә!
Аксубайның 2 нче мәктәбендә Соңгы кыңгырау чарасыннан язманы туры эфирда карагыз.
Следите за самым важным и интересным в Telegram-каналеТатмедиа
Нет комментариев